കോട്ടയത്ത് കുളത്തില്‍ ചൂണ്ടയിടുന്നതിനിടെ രണ്ട് വിദ്യാര്‍ഥികള്‍ മുങ്ങിമരിച്ചു

കോട്ടയം: ചങ്ങനാശ്ശേരിയില്‍ പാറക്കുളത്തില്‍ ചൂണ്ടയിടുന്നതിനിടെ രണ്ട് വിദ്യാര്‍ഥികള്‍ മുങ്ങിമരിച്ചു. പൊന്‍പുഴക്കുന്നില്‍ താമസിക്കുന്ന പത്താം ക്ലാസ് വിദ്യാര്‍ഥി മാടപ്പള്ളി സ്വദേശി ആദര്‍ശ്(15), ആറാം ക്ലാസ് വിദ്യാര്‍ഥി കുറിച്ചി സ്വദേശി അഭിനവ്(12) എന്നിവരാണ് മരിച്ചത്. ചങ്ങനാശേരി തൃക്കൊടിത്താനം ചെമ്പുമ്പുറം പാറക്കുളത്തില്‍ ചൂണ്ടയിടാനെത്തിയതായിരുന്നു. ഉച്ചയ്ക്ക് 12ഓടെയാണ് ഇരുവരും ഇവിടെയെത്തിയതെന്നാണ് നിഗമനം. ചൂണ്ടയിടുന്നതിനിടെ ഒരാള്‍ കാല്‍ വഴുതി വെള്ളത്തില്‍ മുങ്ങിത്താഴുന്നത് കണ്ട് കൂടെയുള്ളയാള്‍ രക്ഷിക്കാന്‍ ശ്രമിക്കുന്നതിനിടെ ഇരുവരും മുങ്ങിത്താഴുകയായിരുന്നുവെന്നാണ് വിവരം. നാട്ടുകാര്‍ വിവരം അറിയിച്ചതോടെ പോലിസും അഗ്‌നിരക്ഷാ സേനയും നടത്തിയ തിരച്ചിലിലാണ് മൃതദേഹങ്ങള്‍ കണ്ടെത്തിയത്. മൃതദേഹങ്ങള്‍ ചങ്ങനാശ്ശേരി ജനറല്‍ ആശുപത്രി മോര്‍ച്ചറിയിലേക്ക് മാറ്റി.