ആണ്‍സുഹൃത്തിന്റെ വീട്ടില്‍ യുവതി ഫാനില്‍ തൂങ്ങിമരിച്ച നിലയില്‍

തിരുവനന്തപുരം: പൂന്തുറയില്‍ ആണ്‍സുഹൃത്തിന്റെ വീട്ടില്‍ യുവതി തൂങ്ങിമരിച്ച നിലയില്‍. മുട്ടത്തറ കല്ലുമ്മൂട് പുതുവല്‍ പുത്തന്‍വീട്ടില്‍ കെ സിന്ധു(38) ആണ് മരിച്ചത്. മുട്ടത്തറ വടുവൊത്ത് ക്ഷേത്രത്തിന് സമീപം എസ്എന്‍ നഗറില്‍ വാടകയ്ക്ക് താമസിക്കുന്ന അരുണ്‍ വി നായരുടെ വീട്ടില്‍ വെളളിയാഴ്ച രാവിലെയായിരുന്നു സംഭവം. അവിവാഹിതനായ അരുണ്‍ വിവാഹം കഴിക്കാന്‍ നീക്കം നടത്തുന്നുവെന്ന വിവരം യുവതി അറിഞ്ഞിരുന്നു. ഇതിന്റെ പ്രകോപനത്തിലാണ് യുവതി വീട്ടില്‍ കടന്നുകയറി മുറിയ്ക്കുളളില്‍ മരിച്ചതെന്ന് പൂന്തുറ പോലീസ് പറഞ്ഞു. സിന്ധു നിലവില്‍ വിവാഹിതയാണ്.

അരുണിന്റെ വീട്ടിലെത്തിയ യുവതി കിടപ്പുമുറിയിലേക്ക് തളളിക്കയറി. വീട്ടുകാര്‍ തടയാന്‍ ശ്രമിച്ചെങ്കിലും മുറിക്കുളളില്‍ കയറി കതകടച്ച് കുറ്റിയിട്ടു. പിന്നീട് നാട്ടുകാരും പൂന്തുറ പോലീസും സ്ഥലത്തെത്തി മുറി ചവിട്ടി തുറന്നെങ്കിലും യുവതി മരിച്ചിരുന്നു. അരുണിനെ പൂന്തുറ പോലീസ് കസ്റ്റഡിയിലെടുത്ത് ചോദ്യം ചെയ്ത് വിട്ടയച്ചു.

വിവാഹക്കാര്യത്തെച്ചൊല്ലി വ്യാഴാഴ്ച രാത്രിയും ഇരുവരും തമ്മില്‍ വഴക്കുണ്ടായിരുന്നതായി പോലിസ് പറഞ്ഞു. അരുണിന്റെ കാര്‍ തടഞ്ഞ സിന്ധു കത്തിയുപയോഗിച്ച് സീറ്റുകള്‍ കുത്തിക്കീറുകയും ചെയ്തു. ആക്രമണം തടയാന്‍ ശ്രമിച്ച അരുണിന് ഇടതുകൈയില്‍ കുത്തേല്‍ക്കുകയും അടിപിടിക്കിടെ സിന്ധുവിന് പരിക്കേല്‍ക്കുകയും ചെയ്തു.

സ്‌കൂളില്‍ ഒരുമിച്ചു പഠിച്ചിരുന്ന സിന്ധുവും അരുണും പൂര്‍വവിദ്യാര്‍ഥി സംഗമത്തില്‍വെച്ച് കണ്ടുമുട്ടിയതോടെയാണ് സൗഹൃദത്തിലായത്. സിന്ധുവിന്റെ മരണത്തില്‍ ബന്ധുക്കളുടെ പരാതിയില്‍ അന്വേഷണം നടത്തുമെന്ന് പോലീസ് പറഞ്ഞു. ആത്മഹത്യക്കുറിപ്പൊന്നും കണ്ടെത്താനായില്ലെന്ന് പോലിസ് അറിയിച്ചു. സിന്ധുവിന് ഭര്‍ത്താവും രണ്ട് മക്കളുമുണ്ട്.