പ്രണയ വിവാഹത്തിന് സഹായിച്ച യുവാവിനെ കൊല്ലാന്‍ ക്വട്ടേഷന്‍; പെണ്‍കുട്ടിയുടെ മാതാപിതാക്കളും ക്വട്ടേഷന്‍ സംഘവും അറസ്റ്റില്‍

കോഴിക്കോട്: പ്രണയ വിവാഹത്തിന് സഹായിച്ച യുവാവിനെ കൊലപ്പെടുത്താന്‍ ക്വട്ടേഷന്‍ നല്‍കിയ കേസില്‍ പെണ്‍കുട്ടിയുടെ മാതാപിതാക്കളും ക്വട്ടേഷന്‍ സംഘാംഗങ്ങളും അറസ്റ്റില്‍. കോഴിക്കോട് ചേവായൂര്‍ പോലിസാണ് സംഭവവുമായി ബന്ധപ്പെട്ട് ഏഴു പേരെ അറസ്റ്റ് ചെയ്തത്. രണ്ടര ലക്ഷം രൂപയ്ക്കാണ് കൊലപാതകം നടത്താന്‍ പെണ്‍കുട്ടിയുടെ വീട്ടുകാര്‍ ക്വട്ടേഷന്‍ കൊടുത്തത്. മൂന്ന് വര്‍ഷം മുമ്പ് നടന്ന മകളുടെ പ്രണയവിവാഹത്തിന് സഹായിച്ചതിന് തലക്കുളത്തൂര്‍ സ്വദേശികളായ അനിരുദ്ധനും അജിതയും യുവാവിനെ ആക്രമിക്കാന്‍ ക്വട്ടേഷന്‍ കൊടുത്തത്. മകള്‍ ജാനറ്റിനെ വിവാഹം ചെയ്ത സ്വരൂപിന്റെ സഹോദരിയുടെ ഭര്‍ത്താവ് റിനീഷിനെ കൊലപെടുത്തനായിരുന്നു ക്വട്ടേഷന്‍.

സ്വര്‍ണം പണയം വെച്ചാണ് ക്വട്ടേഷനുള്ള പണം കൊടുത്തതെന്ന ഇവര്‍ പോലിസിനോട് പറഞ്ഞു. നേരത്തെ ആലപ്പുഴയിലുള്ള മറ്റൊരു ക്വട്ടേഷന്‍ സംഘത്തെ സമീപ്പിച്ചെങ്കിലും അഡ്വാന്‍സ് വാങ്ങിയവര്‍ മറ്റൊരു ക്വട്ടേഷനേറ്റെടുത്തതോടെ പിന്മാറിയെന്നും പോലിസ് പറഞ്ഞു. പെണ്‍കുട്ടിയുടെ പിതാവ് അനിരുദ്ധന്‍, മാതാവ് അജിത, തലക്കുളത്തൂര്‍ സ്വദേശി അരുണിന്റെ നേതൃത്വത്തിലുളള അഞ്ചംഗ ക്വട്ടേഷന്‍ സംഘം എന്നിവരെയാണ് ചേവായൂര്‍ പോലിസ് അറസ്റ്റ് ചെയ്തത്. റിനീഷിനെ ആക്രമിച്ച സ്ഥലത്ത് പ്രതികളെ എത്തിച്ച് തെളിവെടുപ്പും നടത്തി.സിംഗപ്പൂരില്‍ എഞ്ചിനീയറാണ് സ്വരൂപ്. എംബിബിഎസ് വിദ്യാര്‍ഥിനിയാണ് ജാനറ്റ്.