പ്രളയഫണ്ട് തട്ടിപ്പ്: സിപിഎം നേതാക്കള്‍ അടക്കമുള്ള പ്രതികള്‍ അപഹരിച്ചത് 23 ലക്ഷമെന്ന് ക്രൈംബ്രാഞ്ച്
എറണാകുളം കലക്ടറേറ്റിലെ മുഖ്യമന്ത്രിയുടെ ദുരിതാശ്വസ നിധി സെക്ഷന്‍ ക്ലാര്‍ക്കായ കേസിലെ ഒന്നാം പ്രതി വിഷ്ണു പ്രസാദ്, രണ്ടാം പ്രതി കാക്കനാട് മാധവം വീട്ടില്‍ മഹേഷ, മൂന്നാം പ്രതിയായ സിപിഎം പ്രാദേശിക നേതാവ് കാക്കനാട് നിലം പതിഞ്ഞ മുഗള്‍ രാജഗിരി വാലി മറയക്കുളത്ത് വീട്ടില്‍ എം എം അന്‍വര്‍,അന്‍വറിന്റെ ഭാര്യയും അയ്യനാട് സര്‍വീസ് സഹകരണ ബാങ്ക് ഭരണസമിതിയംഗവുമായ നാലാം പ്രതി കൗലത്ത് അന്‍വര്‍, മഹേഷിന്റെ ഭാര്യയും അഞ്ചാം പ്രതിയുമായ എം എം നീതു, സിപിഎമ്മിന്റെ മറ്റൊരു പ്രാദേശിക നേതാവും ആറാം പ്രതിയുമായ എന്‍ എന്‍ നിധിന്‍, ഇയാളുടെ ഭാര്യയും ഏഴാം പ്രതിയുമായ ഷിന്റു എന്നിവര്‍ ചേര്‍ന്നാണ് 23,03,500 രൂപ തട്ടിയതെന്ന് ക്രൈംബ്രാഞ്ച് കോടതിയില്‍ സമര്‍പ്പിച്ച റിപോര്‍ടില്‍ വ്യക്തമാക്കുന്നു. ഗുണഭോക്താക്കളുടെ പട്ടികയില്‍ വിഷ്ണു പ്രസാദ് സ്വയം തന്റെ പേരും തന്റെ വരുതിക്കാരായ അനര്‍ഹരായവരുടെ പേരും ഗുണഭോക്താക്കളാണെന്ന് കാണിച്ച് കൂട്ടിച്ചേര്‍ത്ത് സ്വന്തമായി ലിസ്റ്റുണ്ടാക്കി പണാപഹരണം നടത്തി
കൊച്ചി: കേരളത്തെ തകര്‍ത്ത പ്രളയത്തില്‍ സര്‍വതും നഷ്ടപ്പെട്ട ജനങ്ങളെ സഹായിക്കുന്നതിനായി നല്‍കാന്‍ ശേഖരിച്ച മുഖ്യമന്ത്രിയുടെ ദുരിതാശ്വസ നിധിയില്‍ നിന്നും സെക്ഷന്‍ ക്ലാര്‍ക്കും സിപിഎം നേതാക്കളായ പ്രതികളും ചേര്‍ന്ന് അപഹരിച്ചത് 23 ലക്ഷമെന്ന് ക്രൈംബ്രാഞ്ച് കണ്ടെത്തല്‍.എറണാകുളം കലക്ടറേറ്റിലെ മുഖ്യമന്ത്രിയുടെ ദുരിതാശ്വസ നിധി സെക്ഷന്‍ ക്ലാര്‍ക്കായ കേസിലെ ഒന്നാം പ്രതി വിഷ്ണു പ്രസാദ്, രണ്ടാം പ്രതി കാക്കനാട് മാധവം വീട്ടില്‍ മഹേഷ, മൂന്നാം പ്രതിയായ സിപിഎം പ്രാദേശിക നേതാവ് കാക്കനാട് നിലം പതിഞ്ഞ മുഗള്‍ രാജഗിരി വാലി മറയക്കുളത്ത് വീട്ടില്‍ എം എം അന്‍വര്‍,അന്‍വറിന്റെ ഭാര്യയും അയ്യനാട് സര്‍വീസ് സഹകരണ ബാങ്ക് ഭരണസമിതിയംഗവുമായ നാലാം പ്രതി കൗലത്ത് അന്‍വര്‍, മഹേഷിന്റെ ഭാര്യയും അഞ്ചാം പ്രതിയുമായ എം എം നീതു, സിപിഎമ്മിന്റെ മറ്റൊരു പ്രാദേശിക നേതാവും ആറാം പ്രതിയുമായ എന്‍ എന്‍ നിധിന്‍, ഇയാളുടെ ഭാര്യയും ഏഴാം പ്രതിയുമായ ഷിന്റു എന്നിവര്‍ ചേര്‍ന്നാണ് 23,03,500 രൂപ തട്ടിയതെന്ന് ക്രൈംബ്രാഞ്ച് കോടതിയില്‍ സമര്‍പ്പിച്ച റിപോര്‍ടില്‍ വ്യക്തമാക്കുന്നു.
ഇതില്‍ അന്‍വര്‍,ഭാര്യ കൗലത്ത്, നീതു എന്നിവര്‍ ഒളിവിലാണെന്നും ക്രൈംബ്രാഞ്ച് മൂവാറ്റുപുഴ വിജിലന്‍സ് കോടതിയില്‍ സമര്‍പ്പിച്ച റിപോര്‍ടില്‍ വ്യക്തമാക്കുന്നു.കേസിലെ മുഖ്യപ്രതിയും ദുരിതാശ്വസ നിധി സെക്ഷന്‍ ക്ലാര്‍ക്കുമായ കേസിലെ ഒന്നാം പ്രതി വിഷ്ണു പ്രസാദാണ് തട്ടിപ്പിന്റെ മുഖ്യസൂത്രധാരനെന്നും ക്രൈംബ്രാഞ്ച് റിപോര്‍ടില്‍ വ്യക്തമാക്കുന്നു.ഇയാള്‍ ചോദ്യം ചെയ്യലിനോട് പൂര്‍ണമായും സഹകരിക്കുന്നില്ലെന്നും ക്രൈംബ്രാഞ്ച് വ്യക്തമാക്കുന്നു.അതിനാല്‍ തന്നെ മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും അന്യായമായി ട്രാന്‍സ്ഫര്‍ ചെയ്തതും കൈക്കലാക്കിയതുമായ തുക എത്രയെന്ന് പൂര്‍ണമായി കണ്ടെത്താന്‍ കഴിഞ്ഞിട്ടില്ല.
കേസിന്റെ ആദ്യഘട്ടത്തില്‍ ദുരിതാശ്വാസ നിധി വിതരണത്തില്‍ ഫെയില്‍ ആയ അക്കൗണ്ട് നമ്പര്‍ തിരുത്തി വീണ്ടും ട്രാന്‍സാക്ഷന്‍ നടത്തിയെന്നാണ് വിഷ്ണു പ്രസാദ് വെളിപ്പെടുത്തിയിരുന്നത്. എന്നാല്‍ തുടര്‍ന്നുള്ള അന്വേഷണത്തില്‍ ഗുണഭോക്താക്കളുടെ പട്ടികയില്‍ ഇയാള്‍ സ്വയം തന്റെ പേരും തന്റെ വരുതിക്കാരായ അനര്‍ഹരായവരുടെ പേരും ഗുണഭോക്താക്കളാണെന്ന് കാണിച്ച് കൂട്ടിച്ചേര്‍ത്ത് സ്വന്തമായി ലിസ്റ്റുണ്ടാക്കി പണാപഹരണം നടത്തിയെന്ന് വ്യക്തമായതായും ക്രൈംബ്രാഞ്ച് കോടതിയെ അറിയിച്ചു.
ഇക്കാര്യത്തില്‍ വിശദമായ അന്വേഷണം ആവശ്യമാണ്.ഒന്നാം പ്രതിയായ വിഷ്ണു പ്രസാദ് രണ്ടു മുതല്‍ ഏഴുവരെയുള്ള പ്രതികളുമായി കുറ്റകരമായ രീതിയില്‍ ഗൂഢാലോചന നടത്തി.ദുരിതാശ്വാസം വിതരണം ചെയ്യുന്നതിനുള്ള ജില്ലാ ട്രഷറിയിലെ പൂള്‍ അക്കൗണ്ടില്‍ നിന്നും ദുരിതാശ്വാസ തുകകള്‍ വ്യക്തികള്‍ക്ക് ട്രാന്‍സ്ഫര്‍ ചെയ്തിട്ട് ഫെയിലായി കിടന്നിരുന്ന ട്രാന്‍സാക്ഷനുകളുടെ അക്കൗണ്ട് നമ്പരുകള്‍ തിരുത്തിയതിനു ശേഷം രണ്ടു മുതല്‍ ഏഴുവരെയുള്ള പ്രതികള്‍ നല്‍കിയ വിവിധ അക്കൗണ്ട് നമ്പറിലേക്ക് പണം ട്രാന്‍സഫര്‍ ചെയ്തു.
ഇതു കൂടാതെ വിഷ്ണു പ്രസാദ് തന്റെ പേരില്‍ ഐസി ഐ സി ഐ ബാങ്കിന്റെ കാക്കനാട് ബാഞ്ചിലെ അക്കൗണ്ടിലേക്ക് 2020 ജനുവരി 22 ന് 10,000 രൂപ വീതം രണ്ടു തവണയായി 20,000 രൂപയും എച്ച്ഡിഎഫ്‌സി ബാങ്കിന്റെ പാലാരിവട്ടം ശാഖയിലുള്ള അക്കൗണ്ടിലേക്ക് ഒരു ലക്ഷം രൂപയും രണ്ടര ലക്ഷം രൂപയും വീതം മൊത്തം മൂന്നര ലക്ഷം രൂപയും ജില്ലാ സഹകരണ ബാങ്കിന്റെ തേവര ശാഖയിലെ അക്കൗണ്ടിലേക്ക് 1.25 ലക്ഷം രൂപയും ഇതു കൂടാതെ രണ്ടാം പ്രതിയുടെ പേരില്‍ എറണാകുളം ജില്ലാ സഹകരണ ബാങ്കിന്റെ കാക്കനാട് ബ്രാഞ്ചിലുള്ള അക്കൗണ്ടിലേക്ക് 2.50 ലക്ഷം രൂപയും കാക്കനാട് യൂനിയന്‍ ബാങ്കിലെ അക്കൗണ്ടിലേക്ക് 31,500 രൂപയും പുന്നക്കല്‍ എസ്ബി ഐ ബ്രാഞ്ചിലെ അക്കൗണ്ടിലേക്ക് 31,500 രൂപയും കാക്കനാട് ഫെഡറല്‍ ബാങ്കിലുള്ള അയ്യനാട് സര്‍വീസ് സഹകരണ ബാങ്കിന്റെ പൂള്‍ അക്കൗണ്ടിലേക്ക് 2019 നവംബപര്‍ 28 ന് രണ്ടു പ്രാവശ്യമായി 2.5 ലക്ഷംവീതം ട്രാന്‍സ്ഫര്‍ ചെയ്തു.
ശേഷം മൂന്നാം പ്രതിയും നാലാം പ്രതിയും ബാങ്കില്‍ ചെന്ന് ഫെഡറല്‍ ബാങ്കില്‍ വന്നിരിക്കുന്ന അഞ്ചു ലക്ഷം രൂപയുടെ ട്രാന്‍സാക്ഷന്‍ യുടിആര്‍ നമ്പര്‍ ഒന്നാം പ്രതിയായ വിഷ്ണു പ്രസാദില്‍ നിന്നും ലഭിച്ചത് എന്ന് പറഞ്ഞ് ഈ പണം അയ്യനാട് ബാങ്കില്‍ മൂന്നൂം നാലും പ്രതികളായ അന്‍വറിന്റെയും ഭാര്യ കൗലത്തിന്റെയും പേരിലുളള ജോയിന്റ് അക്കൗണ്ടിലേക്ക് വന്നതാണെന്ന് ബാങ്കിലെ ബോര്‍ഡ് അംഗം കൂടിയായ കൗലത്ത്് ബാങ്ക് ജീവനക്കാരെ പറഞ്ഞ് വിശ്വസിപ്പിച്ചു ജോയിന്റ് അക്കൗണ്ടിലേക്ക് മാറ്റിയശേഷം രണ്ടു ലക്ഷം വീതം രണ്ടു തവണയായി പിന്‍വലിച്ചതായും ക്രൈംബ്രാഞ്ച് റിപോര്‍ടില്‍ വ്യക്തമാക്കുന്നു.2019 നവംബര്‍ 29 ന് കേസിലെ രണ്ടാം പ്രതിയായ മഹേഷിന്റെയും ഇയാളുടെ ഭാര്യയും അഞ്ചാം പ്രതിയുമായ നീതുവിന്റെയും കാക്കനാട് എച്ച്ഡിഎഫ്‌സി ബാങ്കിലെ അക്കൗണ്ടിലേക്ക്് 49,999 രൂപ വീതം ട്രാന്‍സ്ഫര്‍ ചെയ്ത് ഈ പണം രണ്ടും അഞ്ചും പ്രതികള്‍ കൈക്കലാക്കി.
ആറാം പ്രതിയായ നിധിന്‍ തന്റെ പേരില്‍ കാക്കനാട് ഗ്രാമീണ്‍ ബാങ്കിലെ അക്കൗണ്ട്് ബുക്കിന്റെയും അക്കൗണ്ടിന്റെയും തന്റെ ഭാര്യയായ ഷിന്റുവിന്റെ പേരിലുള്ള ദേനാബാങ്കിലെ(നിലവില്‍ ബാങ്ക് ഓഫ് ബറോഡ) അക്കൗണ്ട് ബുക്കിന്റെയും അക്കൗണ്ട് നമ്പറിന്റെയും ഫോട്ടോ കോപ്പി വാട്‌സ് അപ്പിലൂടെ രണ്ടാം പ്രതിയായ മഹേഷിന്് അയച്ചു കൊടുക്കുകയും ഇതു പ്രകാരം മഹേഷ് ഇത് വിഷ്ണു പ്രസാദിന് കൈമാറുകയും ചെയ്തു.തുടര്‍ന്ന് മഹേഷ് ഏഴാം പ്രതിയായ ഷിന്റുവിന്റെ പേരിലുള്ള ദേനാ ബാങ്കിലെ അക്കൗണ്ടിലേക്ക് 2.50 ലക്ഷം രൂപ ട്രാന്‍സഫര്‍ ചെയ്തു.
തുടര്‍ന്ന് ഷിന്റു ഈ പണം ജനുവരി 23ന് ബാങ്കില്‍ എത്തി പണം പിന്‍വലിച്ചു.തുടര്‍ന്ന് വീണ്ടും മഹേഷ് അന്‍വറിന്റെയും ഭാര്യ കൗലത്തിന്റെയും അക്കൗണ്ടിലേക്ക് ട്രഷറിയില്‍ നിന്നും ജനുവരി 21 ന് രണ്ടര ലക്ഷവും ഒന്നേകാല്‍ ലക്ഷവും 24 ന് 1.79 ലക്ഷം രൂപ അയ്യനാട് സര്‍വീസ് സഹകരണ ബാങ്കിന്റെ ഫെഡറല്‍ ബാങ്കിലെ പൂള്‍ അക്കൗണ്ടിലേക്ക് അയച്ചും പണം കൈക്കാലക്കിയതായും ക്രൈംബ്രാഞ്ച് പറയുന്നു.