ആലപ്പുഴ: ജനിതകരോഗമായ സ്‌പൈനല്‍ മസ്‌കുലാര്‍ അട്രോഫി ബാധിച്ച കുട്ടികള്‍ക്ക് അമേരിക്കയില്‍നിന്ന് ഇറക്കുമതി ചെയ്യേണ്ട ഇഞ്ചെക്ഷന് കേന്ദ്രസര്‍ക്കാര്‍ നികുതി ഇളവ് നല്‍കണമെന്ന് എ എം ആരിഫ് എംപി ആവശ്യപ്പെട്ടു. കേരളത്തില്‍നിന്നുള്ള രണ്ട് കുട്ടികള്‍ക്ക് ഈ മരുന്ന് നല്‍കുന്നതിനായി സമൂഹം ഒന്നാകെ കൈകോര്‍ത്തിരിക്കുകയാണ്.
എന്നാല്‍, ഏതാണ്ട് 18 കോടി രൂപ വിലയുള്ള മരുന്ന് ഇറക്കുമതി ചെയ്യുമ്പോള്‍ 6.5 കോടി രൂപ ഇറക്കുമതി ചുങ്കമായും ജിഎസ്ടി ഇനത്തിലുമായി നല്‍കേണ്ടിവരുന്ന സാഹചര്യമാണ് നിലവിലുള്ളത്. ഈ സാഹചര്യത്തില്‍ മാനുഷിക പരിഗണന നല്‍കി നികുതി ഇളവുനല്‍കാനുള്ള അടിയന്തര നടപടികള്‍ സ്വീകരിക്കണമെന്ന് പ്രധാനമന്ത്രി, കേന്ദ്ര ധനകാര്യമന്ത്രി നിര്‍മല സീതാരാമന്‍ എന്നിവര്‍ക്ക് അയച്ച കത്തില്‍ എംപി ആവശ്യപ്പെട്ടു.