നാഗ്പുർ: സര്‍വീസ് റൈഫിൾ വൃത്തിയാക്കുന്നതിനിടെ അബദ്ധത്തിൽ വെടിപൊട്ടി പോലിസുകാരന് ദാരുണാന്ത്യം. മഹാരാഷ്ട്ര സിറോഞ്ച പോലിസ് ദ്രുതകർമ്മ സേന കോൺസ്റ്റബിൾ സഞ്ജീവ് ഷെട്ടിവാർ (30) ആണ് മരിച്ചത്. ഇന്ന് പുലർച്ചയോടെയാണ് സംഭവം. ഗഡ്ചിറോലി സ്വദേശിയാണ്. തോക്ക് വൃത്തിയാക്കുന്നതിനിടെ അറിയാതെ കാഞ്ചിയിൽ വിരലമരുകയായിരുന്നു. ശബ്ദം കേട്ട് വീട്ടുകാർ ഓടിയെത്തിയപ്പോൾ നെറ്റിയിൽ വെടിയേറ്റ നിലയിൽ രക്തം വാർന്നു കിടക്കുകയായിരുന്നു സഞ്ജീവ്. ഉടൻ തന്നെ ആശുപത്രിയിലെത്തിച്ചെങ്കിലും മരണം സ്ഥിരീകരിക്കുകയായിരുന്നു. സംഭവത്തിൽ കേസെടുത്ത പോലിസ് അന്വേഷണം ആരംഭിച്ചിട്ടുണ്ട്.