ഐ.സി.എസ്. പ്രവാസി പുരസ്‌കാരം മണ്ണാര്‍മല സമദ് മൗലവിക്ക് സമര്‍പ്പിച്ചു
ഒരു ലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം.
വണ്ടൂര്‍ : ഇസ്‌ലാമിക്‌ കള്‍ച്ചറല്‍ സൊസൈറ്റി ഓഫ് ഇന്ത്യ (ഐ.സി.എസ്) സൗദി നാഷണല്‍ കമ്മറ്റി ഏര്‍പ്പെടുത്തിയ പ്രവാസി പുരസ്‌കാരം പ്രമുഖ പണ്ഡിതനും പ്രസിദ്ധ മാപ്പിള കവിയുമായ മണ്ണാര്‍മല സമദ് മൗലവിക്ക് സമര്‍പ്പിച്ചു. ഒരു ലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം. വണ്ടൂര്‍ ജാമിഅ: വഹബിയ്യ ഓഡിറ്റോറിയത്തില്‍ നടന്ന ചടങ്ങ് സംസ്ഥാന ജംഇയ്യത്തുല്‍ ഉലമാ ജനറല്‍ സെക്രട്ടറി മൗലാനാ എ.നജീബ് മൗലവി ഉദ്ഘാടനം ചെയ്തു.
സംസ്ഥാന മതവിദ്യാഭ്യാസ ബോര്‍ഡ് ചെയര്‍മാന്‍ സി.കെ.മുഹമ്മദ് അസ്ഗര്‍ മൗലവി ചെറുകര അദ്ധ്യക്ഷത വഹിച്ചു. എസ്.വൈ.എഫ്.സംസ്ഥാന സെക്രട്ടറി ഇ.പി.അഷ്റഫ് ബാഖവി പുരസ്‌കാര ജേതാവിനെ പരിചയപ്പെടുത്തി. സയ്യിദ് ഹാശിം ബാഫഖി തങ്ങള്‍ കൊയിലാണ്ടി, സയ്യിദ് അബ്ദുല്‍ ഖയ്യൂം ശിഹാബ് തങ്ങള്‍, പി.അലിഅക്ബര്‍ മൗലവി അനുമോദന പ്രഭാഷണം നടത്തി. സയ്യിദ് മുസമ്മില്‍ ജിഫ്രി (റിയാദ്), മുഹമ്മദ് മൗലവി പയ്യനാട് (ജിദ്ദ), സൈനുദ്ദീന്‍ കോട്ടക്കുന്ന് (ഖമീസ് മുശൈത്ത്), ഷാജി മണ്ണാര്‍മല, എ.എന്‍.സിറാജുദ്ദീന്‍ മൗലവി,മരുത അബ്ദുല്ലത്തീഫ് മൗലവി സംസാരിച്ചു.