സര്‍ക്കാറിന് 600 രൂപ, സ്വകാര്യ ആശുപത്രികള്‍ക്ക് 1200; ഭാരത് ബയോടെക് വാക്സിന് വില പ്രഖ്യാപിച്ചു
ഇതുവരെ കേന്ദ്ര സര്‍ക്കാരിന് ഡോസിന് 150 രൂപയ്ക്കാണ് വാക്സിന് നല്‍കിയത്
ന്യൂഡല്‍ഹി: ഭാരത് ബയോടെക് നിര്‍മിക്കുന്ന കൊവിഡ് വാക്‌സിനായ കൊവാക്‌സിന്റെ വില പ്രഖ്യാപിച്ചു. സംസ്ഥാനങ്ങള്‍ക്ക് 600 രൂപ നിരക്കില്‍ നല്‍കുമെന്ന് ഭാരത് ബയോടെക് പറഞ്ഞു. ഇത് സ്വകാര്യ ആശുപത്രികള്‍ക്ക് 1200 രൂപക്കാണ് വിതരണം ചെയ്യുക. കയറ്റുമതി ചെയ്യുന്ന ഡോസിന് 15 മുതല്‍ 20 വരെ ഡോളര്‍ ഈടാക്കുമെന്നും ഭാരത് ബയോട്ടെക് പ്രസ്താവനയില്‍ അറിയിച്ചു.
ഇതുവരെ കേന്ദ്ര സര്‍ക്കാരിന് ഡോസിന് 150 രൂപയ്ക്കാണ് വാക്സിന് നല്‍കിയത്. ഇനിയും ഉല്പാദിപ്പിക്കുന്നതിന്റെ പകുതിയില്‍ അധികവും കേന്ദ്രത്തിനു തന്നെ നല്‍കുമെന്നും പ്രസ്താവനയില്‍ പറയുന്നു. കൊവിഷീല്‍ഡ് വാക്സിന് സംസ്ഥാനങ്ങള്‍ക്ക് 400 രൂപ നിരക്കില്‍ നല്‍കാനായിരുന്നു തീരുമാനിച്ചത്. സ്വകാര്യ ആശുപത്രികള്‍ക്ക് ഇത് ഡോസിന് 600 രൂപ നിരക്കിലും ലഭ്യമായിരുന്നു. കേന്ദ്രസര്‍ക്കാറിന് 150 രൂപയ്ക്ക് നല്‍കുന്നത് കരാര്‍ അവസാനിക്കും വരെ തുടുരും.