ദോഹ: ഏഷ്യ വന്‍കരയിലെ ചാംപ്യന്‍ പട്ടം വീണ്ടും ഖത്തറിന്. ഏഷ്യന്‍ ചാമ്പ്യനാകാനുള്ള പോരാട്ടത്തില്‍ ജോര്‍ദാനെ ഒന്നിനെതിരെ മൂന്ന് ഗോളിന് തുരത്തി ഖത്തര്‍ കിരീടം നിലനിര്‍ത്തി. പൊരുതിക്കളിച്ച ജോര്‍ദാനെ പെനാല്‍ട്ടിയിലൂടെയാണ് ഖത്തര്‍ മടക്കിയത്. ഖത്തറിന്റെ മൂന്ന് ഗോളും പെനാല്‍റ്റിയിലൂടെയായിരുന്നു എന്നത് മത്സരത്തിലെ സവിശേഷതയായി.
ഏഷ്യന്‍ വന്‍കരയില്‍ ഖത്തര്‍ ചാമ്പ്യന്‍മാരാകുന്നത് തുടര്‍ച്ചയായ രണ്ടാംതവണയാണ്. മൂന്ന് പെനാല്‍റ്റികളും ജോര്‍ദാന്റെ വലയിലെത്തിച്ച അക്രം അഫീഫിന്റെ ഹാട്രിക് മികവാണ് ചാമ്പ്യന്‍മാര്‍ക്ക് തുണയായത്. സീസണില്‍ വമ്പന്‍ അട്ടിമറികളിലൂടെ കിരീടപോരാട്ടത്തിനിറങ്ങി ജോര്‍ദാന്‍, തകര്‍പ്പന്‍ പ്രകടനം പുറത്തെടുത്തെങ്കിലും വിജയം അകന്നുനിന്നു. ഖത്തറിനായി അക്രം അഫീഫ് ഹാട്രിക്ക് നേടിയപ്പോള്‍ യാസന്‍ അല്‍ നയ്മത്താണ് ജോര്‍ദാന്റെ ആശ്വാസ ഗോള്‍ നേടിയത്.