മുംബൈ: എന്‍സിപി നേതാവ് ശരത് പവാറിനെതിരേ അപകീര്‍ത്തികരമായ ഫേസ്ബുക്ക് പോസ്റ്റ് പങ്കുവച്ച മറാത്തി നടി കേട്കി ചിതലേയെ താനെ പോലിസ് അറസ്റ്റ് ചെയ്തു.
നടി സ്വന്തമായി പോസ്റ്റ് എഴുതുകയായിരുന്നില്ല. മറ്റൊരാള്‍ എഴുതിയ പോസ്റ്റ് സ്വന്തം വാളില്‍ ഷെയര്‍ ചെയ്യുകയായിരുന്നു.
പോസ്റ്റില്‍ ശരത് പവാറിനെക്കുറിച്ച് നേരിട്ടുള്ള പരാമര്‍ശമില്ല, പകരം അദ്ദേഹത്തിന്റെ സര്‍ നെയിം ആണ് ഉപയോഗിച്ചിരിക്കുന്നത്. പവാര്‍ എണ്‍പത് വയസ്സെന്നും എഴുതിയിട്ടുണ്ട്. ശരത് പവാറിന് 81 വയസ്സായി.
'നരകം കാത്തിരിക്കുന്നു', 'നിങ്ങള്‍ ബ്രാഹ്മണരെ വെറുക്കുന്നു', തുടങ്ങിയ ചില വാചകങ്ങള്‍ പോസ്റ്റിലുണ്ട്. പവാറിന്റെ പാര്‍ട്ടി ശിവസേനയും കോണ്‍ഗ്രസും ചേര്‍ന്ന് അധികാരം പങ്കിടുന്നതിനെക്കുറിച്ചായിരുന്നു പോസ്റ്റിലെ പരാര്‍മശം.
താനെയിലെ കല്‍വ പോസ്‌റ്റേഷനിലാണ് പരാതി ലഭിച്ചിരുന്നത്.
നവി മുംബൈയില്‍നിന്ന് ക്രൈംബ്രാഞ്ചാണ് ചിതലേയെ അറസ്റ്റ് ചെയ്തത്.
ഇന്ന് അവരുടെ വസതിയിലേക്ക് എന്‍സിപിക്കാര്‍ ചീമുട്ട എറിഞ്ഞിരുന്നു.
അപകീര്‍ത്തിപരാമര്‍ശത്തിനെതിരേ ഐപിസി 500, 501, 502(2), 153എ, എന്നീ വകുപ്പുകള്‍ പ്രകാരം കേസെടുത്തു. കൂടാതെ ഐടി വകുപ്പുകളും ചുമത്തിയിട്ടുണ്ട്. എന്‍സിപി പ്രവര്‍ത്തകനാണ് പരാതിക്കാരന്‍.