മഴക്കെടുതി: കെഎസ്ഇബി ഉന്നതതല യോഗം ഇന്ന് വൈകീട്ട് മൂന്നിന്
മഴ ദുരന്തം വിതച്ച സാഹചര്യത്തില്‍ അവധി റദ്ദാക്കി വിതരണവിഭാഗത്തിലെ മുഴുവന്‍ പേരും ഡ്യൂട്ടി സ്ഥലത്തെത്താന്‍ കെഎസ്ഇബി നിര്‍ദ്ദേശിച്ചു.
തിരുവനന്തപുരം: സംസ്ഥാനത്തെ വിവിധ പ്രദേശങ്ങളില്‍ കനത്ത മഴയെതുടര്‍ന്നു പ്രകൃതി ദുരന്തം വിതച്ച സാഹചര്യത്തില്‍ സ്ഥിതിഗതികള്‍ നേരിടുന്നതിനായി കെഎസ്ഇബി ഇന്ന് ഉന്നതതല യോഗം ചേരും. കക്കി, ഇടുക്കി, ഇടമലയാര്‍ തുടങ്ങി വന്‍കിട അണക്കെട്ടുകള്‍ തുറക്കേണ്ടിവന്നാല്‍ സ്വീകരിക്കേണ്ട മുന്നൊരുക്കം, പ്രളയബാധിത പ്രദേശങ്ങളിലെ വൈദ്യുതി വിതരണം പുനസ്ഥാപിക്കല്‍ എന്നിവ യോഗം വിലയിരുത്തും.
വൈകീട്ട് മൂന്നിന് മുഴുവന്‍ സമയ ഡയറക്ടര്‍മാരുടെ യോഗവും നാലിന് വിതരണവിഭാഗത്തിലെ മുഴുവന്‍ എക്‌സിക്യൂട്ടീവ് എഞ്ചിനീയര്‍മാരുടെയും യോഗം വിളിച്ചിട്ടുണ്ട്. പ്രത്യേക സാഹചര്യം കണക്കിലെടുത്തു അവധി റദ്ദാക്കി വിതരണവിഭാഗത്തിലെ മുഴുവന്‍ പേരും ഡ്യൂട്ടി സ്ഥലത്തെത്താന്‍ കെഎസ്ഇബി നിര്‍ദ്ദേശിച്ചു.