മാള: (തൃശ്ശൂര്‍) വയോധികയുടെ കമ്മല്‍ കവര്‍ന്ന അന്തര്‍ജില്ലാ മോഷ്ടാവ് അറസ്റ്റില്‍. വടക്കന്‍ പറവൂര്‍ മന്നം ദേശം കോട്ടുവള്ളി മാക്കനായിപറമ്പില്‍ അബ്ബാസിനെ(54) മാള എസ് എച്ച ഒ സജിന്‍ ശശി അറസ്റ്റ് ചെയ്തു. ഗ്രാമപഞ്ചായത്തില്‍ നിന്നും വിവിധ കാര്യങ്ങള്‍ക്ക് ലോണ്‍ പാസായിട്ടുണ്ടെന്നും കുറച്ചു പേര്‍ക്ക് മാത്രമേയുള്ളൂവെന്നും അതില്‍ നിങ്ങള്‍ ഉള്‍പ്പെട്ടിട്ടുണ്ടെന്നും മറ്റാരോടും പറയരുതെന്നും പറഞ്ഞാണ് ഇയാള്‍ വീടുകള്‍ കയറിയിറങ്ങുന്നത്. തുടര്‍ന്ന് ലോണ്‍ കിട്ടാനുള്ള 2,500 രൂപ ഇപ്പോള്‍ തന്നെ അടച്ചാല്‍ രണ്ട് ലക്ഷം രൂപ ഇന്നുതന്നെ പാസാക്കി തരാമെന്നും വാഗ്ദാനം ചെയ്യും.
ഇത്തരത്തില്‍ പൊയ്യ മഠത്തുംപടി പൊക്ലന്‍കുന്നില്‍ മൂത്തേടത്ത് കണ്ണന്റെ ഭാര്യ കാര്‍ത്തു (80) എന്ന സ്ത്രീയോട് 2500 രൂപ വേണമെന്ന് ആവശ്യപ്പെട്ടപ്പോള്‍ അവര്‍ കൊടുത്തില്ല. വീട്ടില്‍ മറ്റാരുമില്ലെന്നു മനസ്സിലാക്കിയ പ്രതി കൊല്ലുമെന്ന് ഭീഷണിപ്പെടുത്തി. വൃദ്ധയുടെ കാതില്‍ കിടന്നിരുന്ന ഒരു ജോഡി സ്വര്‍ണ കമ്മല്‍ ബലമായി കവര്‍ച്ച ചെയ്തു.
കമ്മല്‍ പറവൂരിലെ ജ്വല്ലറിയില്‍ വില്‍പ്പന നടത്തി. തനിയെ താമസിക്കുന്ന സാധാരണക്കാരായ ആളുകളെ വീടുകളില്‍ പകല്‍ കയറിച്ചെന്നാണ് പ്രതി കവര്‍ച്ച നടത്തുന്നത്. പ്രതിയെ കോടതിയില്‍ ഹാജരാക്കി.
അന്വേഷണ സംഘത്തില്‍ സബ് ഇന്‍സ്‌പെക്ടര്‍ ജിജോ, ഇന്‍സ്‌പെക്ടര്‍മാരായ സുധാകരന്‍, തോമസ്, സീനിയര്‍ സിവില്‍ പോലിസ് ഓഫിസര്‍മാരായ ജിബിന്‍ കെ ജോസഫ്, ജോബി, വിമല്‍, വിപിന്‍ ബാബു എന്നിവരും ഉണ്ടായിരുന്നു.