തടവുകാരന്‍ ജയില്‍ ചാടാന്‍ ശ്രമം; മരത്തില്‍ കയറിയ സുഭാഷ് ചില്ല ഒടിഞ്ഞ് താഴെ വലയിലേക്ക് വീണു
പോലിസും ഫയര്‍ഫോഴ്‌സും താഴെ വല വിരിച്ചിരുന്നു
തിരുവനന്തപുരം: പൂജപ്പുര സെന്‍ട്രല്‍ ജയില്‍ ചാടാന്‍ ശ്രമിച്ച തടവുകാരന്‍ 'വലയിലായി'. ജയില്‍ ചാടല്‍ പരാജയപ്പെട്ടതോടെ തൊട്ടടുത്ത മരത്തില്‍ കയറിയ തടവുകാരന്‍ മരച്ചില്ല ഒടിഞ്ഞ് താഴെ വലയിലേക്ക് വീണു. വൈകീട്ട് 4.40 ഒടെയാണ് സംഭവം.
മരത്തിന് മുകളില്‍ കയറിയ തടവുകാരനെ താഴെയിറക്കാന്‍ ഫയര്‍ഫോഴ്‌സും പോലിസും വലിയ ശ്രമം നടത്തിയിരുന്നു. കോട്ടയം സ്വദേശി കൊലക്കേസ് പ്രതി സുഭാഷാണ് മരത്തിന് മുകളില്‍ കയറി ആത്മഹത്യ ഭീഷണി മുഴക്കിയത്. സുഭാഷ് താഴേക്ക് വീഴുകയാണെങ്കില്‍ രക്ഷിക്കാന്‍ താഴെ വലവിരിച്ചിട്ടുണ്ടായിരുന്നു.
ജയില്‍ ഓഫിസില്‍ ഹാജരാക്കിയ ശേഷം തിരിച്ച് പോകുന്നതിനിടെ സുഭാഷ് ഓടുകയായിരുന്നു. പുറത്തേക്ക് ഓടിയ സുഭാഷ് തൊട്ടടുത്ത ഷെല്‍ട്ടര്‍ ഹോമിലെ മരത്തിലേക്ക് കയറി. മരത്തിന് മുകളില്‍ കയറിയ ശേഷം സുഭാഷ് ആത്മഹത്യ ഭീഷണി മുഴക്കുകയായിരുന്നു. ഫയര്‍ഫോഴ്‌സ് ഉദ്യോഗസ്ഥര്‍ മരത്തില്‍ കയറി സുഭാഷിനെ അനുനയിപ്പിച്ച് താഴെയിറക്കാന്‍ ശ്രമിച്ചെങ്കിലും നടന്നില്ല. ഒടുവില്‍ ചില്ല് ഒടിഞ്ഞ് സുഭാഷ് താഴേ വലയിലേക്ക് വീണു. സുഭാഷിന്റെ ആരോഗ്യ നില തൃപ്തികരമാണെന്ന് ഡോക്ടര്‍മാര്‍ അറിയിച്ചു.
തന്റെ ജയില്‍ ഉദ്യോഗസ്ഥര്‍ തന്നെ മര്‍ദ്ദിക്കുന്നതായും ഭാര്യയുടേയും കുടുംബത്തിന്റെയും കാര്യം ദുരിതത്തിലാണെന്നും മാധ്യമങ്ങളോട്് സംസാരിക്കണമെന്നും സുഭാഷ് പറയുന്നു. തനിക്ക് ജഡ്ജിയെ കാണണമെന്നും സുഭാഷ് മരത്തിന് മുകളില്‍ നിന്ന് പറയുന്നുണ്ട്.