യുവാക്കള്‍ക്ക് പ്രാതിനിധ്യം ഇല്ലാത്തതില്‍ പ്രതിഷേധം: സ്ഥാനാര്‍ഥിയാകാനില്ലെന്ന് ചാണ്ടി ഉമ്മന്‍
ശക്തമായ ത്രികോണ മത്സരം നടക്കുന്ന തിരുവനന്തപുരം കോര്‍പ്പറേഷനില്‍ പോലും യൂത്ത് കോണ്‍ഗ്രസ് നിര്‍ദ്ദേശിച്ച ഒരാളെ മാത്രമാണ് പരിഗണിച്ചത്. ഇത് കടുത്ത അവഗണനയാണെന്ന് ചാണ്ടി ഉമ്മന്‍ പറഞ്ഞു.
കോട്ടയം: സ്ഥാനാര്‍ത്ഥി നിര്‍ണയത്തില്‍ യുവാക്കളെ പരിഗണിക്കാത്ത സാഹചര്യത്തില്‍ താന്‍ മാത്രം മത്സരിക്കുന്നത് ശരിയല്ലെന്ന് ചാണ്ടി ഉമ്മന്‍. മുന്‍ മുഖ്യമന്ത്രി ഉമ്മന്‍ ചാണ്ടിയുടെ മകനും യൂത്ത് കോണ്‍ഗ്രസ് നേതാവുമായി ചാണ്ടി ഉമ്മന്‍ കോട്ടയം ജില്ലാ പഞ്ചായത്തിലേക്ക് പുതുപ്പള്ളിയില്‍ നിന്നും മത്സരിക്കാന്‍ തീരുമാനിച്ചിരുന്നു. ഇത് ആവശ്യപ്പെട്ട് യൂത്ത് കോണ്‍ഗ്രസ് ഡിസിസിക്ക് കത്ത് നല്‍കിയിരുന്നു. സീറ്റ് ലഭിച്ചുവെങ്കിലും മത്സരിക്കാനില്ലെന്ന് ചാണ്ടി ഉമ്മന്‍ വ്യക്തമാക്കി.
സ്വന്തം തീരുമാനത്തിന്റെ അടിസ്ഥാനത്തിലാണ് പിന്‍മാറ്റമെന്നും ചാണ്ടി ഉമ്മന്‍ പറഞ്ഞു. ശക്തമായ ത്രികോണ മത്സരം നടക്കുന്ന തിരുവനന്തപുരം കോര്‍പ്പറേഷനില്‍ പോലും യൂത്ത് കോണ്‍ഗ്രസ് നിര്‍ദ്ദേശിച്ച ഒരാളെ മാത്രമാണ് പരിഗണിച്ചത്. ഇത് കടുത്ത അവഗണനയാണെന്ന് ചാണ്ടി ഉമ്മന്‍ പറഞ്ഞു. മത്സര രംഗത്തില്ലെങ്കിലും ചാണ്ടി ഉമ്മന്‍ വോട്ട് അഭ്യര്‍ത്ഥിച്ചു പ്രചരണരംഗത്ത് സജീവമാണ് തിരഞ്ഞെടുപ്പ് പ്രചാരണത്തിനിടെ പരുക്കേറ്റ ചെമ്പഴന്തി വാര്‍ഡിലെ യു ഡി എഫ് സ്ഥാനാര്‍ഥി അണിയൂര്‍ എം പ്രസന്നകുമാറിന് വേണ്ടിയാണ് ചാണ്ടി ഉമ്മന്റെ വോട്ടഭ്യര്‍ഥന.