ശബരീനാഥിന്റെ അറസ്റ്റ്: പ്രതിഷേധത്തെ ഭയപ്പെടുന്നത് ഫാഷിസമെന്ന് കെ കെ അബ്ദുല്‍ ജബ്ബാര്‍
എതിര്‍ ശബ്ദങ്ങളോട് മോഡിയും യോഗിയും തുടരുന്ന അതേ നിലപാടാണ് പിണറായി വിജയനും തുടരുന്നത്
തിരുവനന്തപുരം: മുന്‍ എംഎല്‍എ ശബരീനാഥിന്റെ അറസ്റ്റ് ഇടത് സര്‍ക്കാര്‍ പ്രതിഷേധങ്ങളെയും വിമര്‍ശനങ്ങളെയും എത്രമാത്രം ഭയപ്പെടുന്നു എന്നു വ്യക്തമാക്കുന്നതാണെന്നും ഇത് ഫാഷിസമാണെന്നും എസ്ഡിപിഐ സംസ്ഥാന സെക്രട്ടറി കെ കെ അബ്ദുല്‍ ജബ്ബാര്‍. എതിര്‍ ശബ്ദങ്ങളോട് മോഡിയും യോഗിയും തുടരുന്ന അതേ നിലപാടാണ് പിണറായി വിജയനും തുടരുന്നത്. ഉന്നത ഉദ്യോഗസ്ഥരെ അയച്ച് ഗുജറാത്തില്‍ നിന്ന് ഇതാണോ പഠിച്ചതെന്ന് മുഖ്യമന്ത്രി വ്യക്തമാക്കണം. ചിലരെ പ്രത്യേകം ടാര്‍ജറ്റ് ചെയ്ത് അറസ്റ്റും കോലാഹലങ്ങളും സൃഷ്ടിച്ച് സര്‍ക്കാരിനെതിരായ ജനവികാരം വഴി തിരിച്ചുവിടാനുള്ള ശ്രമം കഴിഞ്ഞ കുറേ നാളുകളായി മുഖ്യമന്ത്രി പിണറായി വിജയന്‍ തുടരുകയാണ്. സര്‍ക്കാര്‍ പ്രതിസന്ധിയിലാവുമ്പോഴൊക്കെ ഇത്തരം കുടില ബുദ്ധി പ്രയോഗിച്ചു വരികയാണ്.
ബിജെപി സര്‍ക്കാരിന്റെ കാര്‍ബണ്‍ പകര്‍പ്പായി കേരളത്തിലെ ഇടതു സര്‍ക്കാര്‍ മാറിയിരിക്കുന്നു. അതേസമയം സംഘ പരിവാരത്തിനെ വേദനിപ്പിപ്പിക്കാതിരിക്കാന്‍ പരമാവധി ശ്രമിക്കുന്നുമുണ്ട്. വിവേചനത്തിനും സ്വജന പക്ഷ പാതത്തിനും കുപ്രസിദ്ധി നേടിയ സര്‍ക്കാരായി ഇടതു സര്‍ക്കാര്‍ മാറിയിരിക്കുകയാണെന്നും കെ കെ അബ്ദുല്‍ ജബ്ബാര്‍ കുറ്റപ്പെടുത്തി.