ഈരാറ്റു പേട്ടയില്‍ പി സി ജോര്‍ജ്ജിന്റെ തെറിയഭിഷേകം; വാട്‌സാപ്പ് ഗ്രൂപ്പില്‍ വിദ്വേഷ പ്രചാരണം
കോട്ടയം: വോട്ടഭ്യര്‍ഥിക്കുന്നതിനിടെ ഈരാറ്റുപേട്ടയില്‍ നാട്ടുകാര്‍ക്കു നേരെ പി സി ജോര്‍ജ്ജിന്റെ തെറിയഭിഷേകം. തേവരു പാറയില്‍ വൈകീട്ടോടെയാണ് സംഭവം. വോട്ട് ചോദിച്ച് ജോര്‍ജ്ജ് സംസാരം തുടങ്ങിയതോടെ ചിലര്‍ കൂവാന്‍ തുടങ്ങി. അതോടെ ജോര്‍ജ്ജ് പതിവു ശൈലിയില്‍ അസഭ്യവര്‍ഷം തുടങ്ങി. പ്രചാരണ വാഹനത്തില്‍ നിന്നിറങ്ങാതെയാണ് ജോര്‍ജ്ജ് സംസാരിച്ചത്. പ്രസംഗം അവസാനിപ്പിച്ച് ജോര്‍ജ്ജിന്റെ വാഹനം നീങ്ങുന്നതുവരെ ചിലര്‍ ഉച്ചത്തില്‍ കൂവി വിളിച്ചു.
അതിനിടെ, ജോര്‍ജ്ജിന്റെ പ്രചാരണത്തിനായുള്ള വാട്‌സാപ്പ് ഗ്രൂപ്പുകളില്‍ കടുത്ത മുസ്‌ലിം വിദ്വേഷ പ്രചാരണങ്ങള്‍ നടക്കുന്നതിന്റെ തെളിവുകള്‍ പുറത്തുവന്നു. ഇതിനെതിരെ പോലിസിനും തിരഞ്ഞെടുപ്പ് കമ്മീഷനും പരാതി നല്‍കാനുള്ള നീക്കത്തിലാണ് മുന്നണികളും പാര്‍ട്ടികളും.