മാള: ലക്ഷങ്ങള്‍ വിലമതിക്കുന്ന 23 സെന്റ് സ്ഥലം ഗ്രാമപഞ്ചായത്ത് റോഡിന് സൗജന്യമായി വിട്ട് നല്‍കി മാതൃകയാവുകയാണ് വെള്ളൂര്‍ സ്വദേശികളായ രണ്ട് ചെറുപ്പക്കാര്‍. പുത്തന്‍ചിറ ഗ്രാമപഞ്ചായത്തിലെ ചെമ്പനേഴത്ത് കമലാലയന്റെയും വട്ടപ്പറമ്പില്‍ കുഞ്ഞുമുഹമ്മദിന്റെയും കനിവില്‍ ചെറിയ നടപ്പാത മാത്രമായിരുന്ന വെള്ളൂര്‍ വിഷ്ണുമായ റോഡിന്റെ വീതി ഇതോടെ വര്‍ധിക്കും. കമലാലയന്‍ 16.5 സെന്റും കുഞ്ഞുമുഹമ്മദ് 6.5 സെന്റുമാണ് ഗ്രാമപഞ്ചായത്തിന് വിട്ടുകൊടുത്തത്.
ഓട്ടോ തൊഴിലാളിയായ കമലാലയന്‍ കൃഷിക്കാരന്‍ കൂടിയാണ്. കുഞ്ഞുമുഹമ്മദ് വെള്ളൂരില്‍ പലചരക്ക് കട നടത്തുകയാണ്.
റോഡ് യാഥാര്‍ത്ഥ്യമായാല്‍ പ്രദേശവാസികള്‍ക്ക് എളുപ്പത്തില്‍ വെള്ളൂര്‍ സെന്ററിലേക്ക് എത്താന്‍ സാധിക്കും. വാര്‍ഡംഗം സംഗീത അനീഷിന്റെ മുന്‍കയ്യിലാണ് ഇരുവരും റോഡിനുള്ള സ്ഥലം നല്‍കിയത്. റോഡിന്റെ നിര്‍മ്മാണത്തിനായി വി ആര്‍ സുനില്‍കുമാര്‍ എം എല്‍ എ 23.6 ലക്ഷം രൂപ അനുവദിക്കുകയും ചെയ്തതോടെ നടപടികള്‍ വേഗത്തിലായി. മൂന്നു മീറ്റര്‍ വീതിയിലും മുന്നൂറ് മീറ്റര്‍ നീളത്തിലുമാണ് പുതിയ റോഡ് നിര്‍മിക്കുന്നത്.
നിര്‍മാണോദ്ഘാടനം വി ആര്‍ സുനില്‍കുമാര്‍ എംഎല്‍എ നിര്‍വ്വഹിച്ചു. പുത്തന്‍ചിറ ഗ്രാമപഞ്ചായത്ത് പ്രസിഡന്റ് വി എ നദീര്‍ അദ്ധ്യക്ഷത വഹിച്ചു. ഗ്രാമപഞ്ചായത്തംഗങ്ങളായ സംഗീത അനീഷ്, ബീന സുധാകരന്‍, പി ഐ നിസാര്‍, കെ വി സുജിത്ത് ലാല്‍ തുടങ്ങിയവര്‍ സംസാരിച്ചു.