പ്രിന്‍സിപ്പല്‍മാരുടെ ജോലിഭാരം കുറച്ചു; ഹയര്‍സെക്കന്‍ഡറി പ്രിന്‍സിപ്പല്‍മാരുടെ അധ്യാപന ജോലി ആഴ്ചയില്‍ എട്ട് പിരീഡാക്കി
തിരുവനന്തപുരം: സംസ്ഥാനത്തെ സര്‍ക്കാര്‍ എയ്ഡഡ് ഹയര്‍സെക്കന്‍ഡറി സ്‌കൂളുകളിലെ പ്രിന്‍സിപ്പല്‍മാരുടെ അധ്യാപന ജോലി ആഴ്ചയില്‍ എട്ട് പിരീഡ് ആയി നിജപ്പെടുത്തി. പ്രിന്‍സിപ്പല്‍ പഠിപ്പിക്കേണ്ട വിഷയത്തില്‍ 8 പിരീഡ് കഴിച്ചു വരുന്ന പിരീഡുകള്‍ പഠിപ്പിക്കുന്നതിനായി പ്രസ്തുത വിഷയത്തില്‍ ആ സ്‌കൂളില്‍ പിരീഡ് കുറവുള്ള ജൂനിയര്‍ അധ്യാപകരുണ്ടെങ്കില്‍ 14 പിരീഡ് വരെ ആ അധ്യാപകര്‍ക്ക് നല്‍കും. ഇത്തരത്തില്‍ അധ്യാപകര്‍ ലഭ്യമല്ലാത്ത സാഹചര്യങ്ങളില്‍ ദിവസവേതന അടിസ്ഥാനത്തില്‍ അധ്യാപകരെ നിയമിക്കാനുള്ള മുന്‍ ഉത്തരവ് അടിയന്തിരമായി നടപ്പാക്കും. മന്ത്രി വി ശിവന്‍കുട്ടിയുടെ നിര്‍ദ്ദേശപ്രകാരമാണ് നടപടി.