മദ്യപിച്ചു ബഹളം വച്ചത് ചോദ്യം ചെയ്ത യുവാവിനെ വെട്ടിപ്പരുക്കേല്‍പിച്ച സംഭവം; 3 പേര്‍ അറസ്റ്റില്‍
കൊല്ലങ്കോട്: മദ്യപിച്ചു ബഹളം വച്ചത് ചോദ്യം ചെയ്ത യുവാവിനെ വീട്ടില്‍ കയറി വെട്ടിപ്പരുക്കേല്‍പിച്ച കേസിലെ മൂന്ന് പ്രതികളെ പൊലിസ് അറസ്റ്റ് ചെയ്തു. ചുള്ളിയാര്‍ഡാം സ്വദേശി എസ്.ഷിബു (25), മിനുക്കം പാറ സ്വദേശികളായ എല്‍ രാജീവ് (23), ആര്‍ അനു(25) എന്നിവരാണ് അറസ്റ്റിലായത്. 22ന് പോത്തമ്പാടം പെരുംചിറ ആര്‍. ജയേഷിനെ(32) വീട്ടില്‍ കയറി മാരകായുധം കൊണ്ടു കൈത്തണ്ടയില്‍ വെട്ടി പരുക്കേല്‍പിച്ചെന്നാണ് കേസ്.
കൊടുവാളും പ്രതികള്‍ സഞ്ചരിച്ച ബൈക്കും കസ്റ്റഡിയിലെടുത്തു. പൊലിസും ഫൊറന്‍സിക് വിദഗ്ധരും നടത്തിയ പരിശോധനയിലാണ് പ്രതികളെ പിടികൂടിയത്. പരുക്കേറ്റ ജയേഷ് തൃശൂരിലെ സ്വകാര്യ ആശുപത്രിയില്‍ ചികിത്സയിലാണ്. ചിറ്റൂര്‍ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
സിഐ എ വിപിന്‍ദാസ്, ഗ്രേഡ് എസ്‌ഐ യാക്കൂബ്, കെ രമേഷ്, സി. സുകുമാരന്‍, എസ് ജിജോ എന്നിവരാണ് അന്വേഷണസംഘത്തില്‍ ഉണ്ടായിരുന്നത്.