രാജ്യത്തോട് ആര്‍എസ്എസ് ചെയ്തത് ഇടതുപക്ഷം ചെയ്തിട്ടില്ലെന്ന് രാഹുല്‍ ഗാന്ധി
ആര്‍എസ്എസ് രാജ്യത്തോട് ചെയ്തതൊന്നും ഇടതുപക്ഷം ചെയ്തിട്ടില്ലെന്ന് ആലപ്പുഴയില്‍ നടത്തിയ തിരഞ്ഞെടുപ്പ് പ്രചാരണപരിപാടിയില്‍ രാഹുല്‍ ഗാന്ധി പറഞ്ഞു.
ആലപ്പുഴ: ആര്‍എസ്എസ്സിനെ കടന്നാക്രമിച്ചും ഇടതുപക്ഷത്തെ തലോടിയും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. ആര്‍എസ്എസ്സിനെ പോലെ അല്ല ഇടതുപക്ഷം. ആര്‍എസ്എസ് രാജ്യത്തോട് ചെയ്തതൊന്നും ഇടതുപക്ഷം ചെയ്തിട്ടില്ലെന്ന് ആലപ്പുഴയില്‍ നടത്തിയ തിരഞ്ഞെടുപ്പ് പ്രചാരണപരിപാടിയില്‍ രാഹുല്‍ ഗാന്ധി പറഞ്ഞു. ആര്‍എസ്എസ്സിനെ പോലെ ഇടതുപക്ഷം ഭരണഘടനാ സ്ഥാപനങ്ങളെ തകര്‍ക്കാന്‍ ശ്രമിച്ചിട്ടില്ല.
ആര്‍എസ്എസ്സിനെ പ്രതിരോധിക്കാന്‍ കഴിയുക കോണ്‍ഗ്രസ്സിന് മാത്രമാണ്. ആര്‍എസ്എസ്സിനെയും ഇടതുപക്ഷത്തെയും രണ്ടായാണ് കാണുന്നത്. ഇടതുപക്ഷത്തിനെതിരേ ഒരക്ഷരം പറയില്ലെന്ന് വയനാട്ടില്‍ നാമനിര്‍ദേശ പത്രിക സമര്‍പ്പിക്കാനെത്തിയപ്പോള്‍തന്നെ രാഹുല്‍ ഗാന്ധി പറഞ്ഞിരുന്നു. തെക്കന്‍ കേരളത്തില്‍ പത്തനാപുരത്തുനിന്ന് തുടങ്ങി പത്തനംതിട്ടയിലും ആലപ്പുഴയിലുമെല്ലാം പൊതുയോഗങ്ങളില്‍ പങ്കെടുത്തെങ്കിലും ഒരു വിമര്‍ശനവും രാഹുല്‍ ഇടതുപക്ഷത്തിനെതിരേ പറഞ്ഞതുമില്ല.