തിരുവല്ലത്ത് കെഎസ്ആര്‍ടിസി ബസിന് നേരെ കല്ലേറ്
ബുള്ളറ്റില്‍ ഹെല്‍മറ്റ് ധരിച്ചെത്തിയ അ‍ജ്ഞാതന്‍ ബസിന്റെ മുന്നിലും പിന്നിലുമുള്ള ചില്ലുകള്‍ എറിഞ്ഞ് തകർക്കുകയായിരുന്നു
തിരുവനന്തപുരം: ഓടിക്കൊണ്ടിരുന്ന കെഎസ്ആര്‍ടിസി ബസിന് നേരെ കല്ലേറ്. തിരുവനന്തപുരം കിഴക്കേക്കോട്ടയില്‍ നിന്നും പുറപ്പെട്ട ബസിനു നേരെയാണ് ഇന്നു രാവിലെ കല്ലേറുണ്ടായത്. തിരുവല്ലത്തിനടുത്തുവച്ചാണ് സംഭവം.
ബുള്ളറ്റില്‍ ഹെല്‍മറ്റ് ധരിച്ചെത്തിയ അ‍ജ്ഞാതന്‍ ബസിന്റെ മുന്നിലും പിന്നിലുമുള്ള ചില്ലുകള്‍ എറിഞ്ഞ് തകർക്കുകയായിരുന്നു. സംഭവത്തിൽ ആർക്കും പരിക്കേറ്റിട്ടില്ല. സംഭവത്തേത്തുടർന്ന് ബസ് സര്‍വീസ് നിര്‍ത്തിവച്ചു. യാത്രക്കാരെ മറ്റ് ബസുകളില്‍ കയറ്റിവിട്ടു. സംഭവത്തില്‍ പോലിസ് അന്വേഷണം ആരംഭിച്ചിട്ടുണ്ട്.
കോവളം ബൈപ്പാസിൽ കഴിഞ്ഞ ദിവസം ഓടിക്കൊണ്ടിരുന്ന കെഎസ്ആർടിസി ബസിന്റെ ഡോർ തുറന്ന് റോഡിലേക്ക് തെറിച്ചുവീണ് രണ്ടു കുട്ടികൾക്ക് പരിക്കേറ്റിരുന്നു.