കുപ്പിവെള്ളത്തിന്റെ വില നിയന്ത്രണം: സര്‍ക്കാര്‍ അപ്പീല്‍ ഹൈക്കോടതി തള്ളി
കുപ്പിവെള്ളത്തിന് വില ലിറ്ററിന് 13 രൂപ ആക്കിയത് റദ്ദാക്കിയ സിംഗിള്‍ ബെഞ്ചിന്റെ ഇടക്കാല ഉത്തരവ് റദ്ദാക്കണമെന്ന് ആവശ്യപ്പെട്ട് ആയിരുന്നു സര്‍ക്കാര്‍ അപ്പീല്‍. സിംഗിള്‍ ബഞ്ച് പുറപ്പെടുവിച്ചത് ഇടക്കാല ഉത്തരവ് മാത്രമാണെന്നും വിശദമായ വാദം സിംഗിള്‍ ബഞ്ചില്‍ നടത്താവുന്നതാണെന്നും ഡിവിഷന്‍ ബഞ്ച് നേരെത്തെ വ്യക്തമാക്കിയിരുന്നു
കൊച്ചി: കുപ്പിവെള്ളത്തിന്റെ വില നിയന്ത്രണം റദ്ദാക്കിയതിനെ ചോദ്യം ചെയ്ത് സര്‍ക്കാര്‍ നല്‍കിയ അപ്പീല്‍ഹൈക്കോടതി ഡിവിഷന്‍ ബഞ്ച് തള്ളി. കുപ്പിവെള്ളത്തിന് വില ലിറ്ററിന് 13 രൂപ ആക്കിയത് റദ്ദാക്കിയ സിംഗിള്‍ ബെഞ്ചിന്റെ ഇടക്കാല ഉത്തരവ് റദ്ദാക്കണമെന്ന് ആവശ്യപ്പെട്ട് ആയിരുന്നു സര്‍ക്കാര്‍ അപ്പീല്‍.സിംഗിള്‍ ബഞ്ച് പുറപ്പെടുവിച്ചത് ഇടക്കാല ഉത്തരവ് മാത്രമാണെന്നും വിശദമായ വാദം സിംഗിള്‍ ബഞ്ചില്‍ നടത്താവുന്നതാണെന്നും ഡിവിഷന്‍ ബഞ്ച് നേരെത്തെ വ്യക്തമാക്കിയിരുന്നു.
എന്നാല്‍ ഭക്ഷ്യസുരക്ഷാ നിയമം അനുസരിച്ച് പാക്ക് ചെയ്ത വരുന്ന ഭക്ഷ്യവസ്തുക്കളുടെ വിലനിര്‍ണയം നടത്തേണ്ടത് കേന്ദ്രസര്‍ക്കാരാണെന്നായിരുന്നു ഹരജിക്കാരുടെ വാദം. ഹൈക്കോടതി ഉത്തരവ് വന്നതോടെ സംസ്ഥാനത്ത് കുപ്പിവെള്ളത്തിന്റെ വില 13 രൂപയില്‍ നിന്നും 20 രൂപയാക്കി ഉല്‍പ്പാദകര്‍ വര്‍ധിപ്പിച്ചിരുന്നു. അവശ്യസാധന വില നിയന്ത്രണ നിയമത്തിന്റെ പരിധിയില്‍ ഉള്‍പ്പെടുത്തി കഴിഞ്ഞ വര്‍ഷം ഫെബ്രുവരിയിലാണ് സംസ്ഥാന സര്‍ക്കാര്‍ കുപ്പിവെള്ളത്തിന് ലിറ്ററിന് പരമാവധി 13 രൂപയായി നിശ്ചയിച്ചത്. ഇതിനെതിരെ കുപ്പിവെള്ള ഉല്‍പാദക സംഘടന സമര്‍പ്പിച്ച ഹരജിയിലാണ് ഹൈക്കോടതി സിംഗിള്‍ ബെഞ്ച് സ്‌റ്റേ ഉത്തരവ് നല്‍കിയത്.