തിരൂരങ്ങാടി: കളിയാട്ടമൂക്കില്‍ മയക്കുമരുന്ന് ഗുളികകള്‍ പിടികൂടി. മാനസിക രോഗത്തിനും വേദനക്കും മറ്റുമായി ഡോക്ടര്‍മാര്‍ നിര്‍ദേശിക്കുന്ന 705 അല്‍പ്രസോളം ഗുളികകളും 200 ക്ലോണസെപാം ഗുളികകളുമാണ് പരപ്പനങ്ങാടി എക്‌സൈസ് റെയിഞ്ച് ഉദ്യോഗസ്ഥര്‍ പിടിച്ചെടുത്തത്. പാറേക്കാവ് സ്വദേശി പുത്തന്‍ മാളിയേക്കല്‍ ഫായിസ്(30)ആണ് പിടിയിലായത്.
ഡോക്ടര്‍മാര്‍ സെഡേഷനുവേണ്ടി നല്‍കുന്ന ഈ ഗുളികള്‍ പ്രിസ്‌ക്രിപ്ഷനില്ലാതെ ഒരുകാരണവശാലും നല്‍കാന്‍ പാടില്ലാത്തതാണ്. എന്നാല്‍ ഒരു മെഡിക്കല്‍ ഷോപ്പിന്റെ മറവില്‍ അനധികൃതമായി ഇത്തരത്തിലുള്ള മരുന്നുകള്‍ വില്‍പ്പന നടത്തുന്നു എന്ന രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് ഇവ കണ്ടെത്താനായതെന്ന് എക്‌സൈസ് ഇന്‍സ്‌പെക്ടര്‍ എം ഒ വിനോദ് പറഞ്ഞു. ഓട്ടോറിക്ഷയില്‍ ഈ ഗുളികള്‍ വില്‍പ്പന നടത്താനായി പോകുന്നതിനിടയിലാണ് ഇയാള്‍ ഉദ്യോഗസ്ഥരുടെ പിടിയിലാവുന്നത്. മലപ്പുറം ജില്ലയില്‍ തന്നെ ഇത്രയധികം മയക്കുമരുന്നു ഗുളികകള്‍ പിടിച്ചെടുത്ത കേസുകള്‍ കുറവാണ്.