ചിറ്റാറ്റുകരയില്‍ ടിപിആര്‍ 30 ശതമാനത്തിനു മുകളില്‍; ക്ലസ്റ്റര്‍ ആക്കി മാറ്റാന്‍ തീരുമാനം
ജില്ലയിലെ 11 പഞ്ചായത്തുകളില്‍ ടി പി ആര്‍ 8% താഴെയാണ്. 14 പഞ്ചായത്തുകളില്‍ 20-30 % ഇടയിലാണ്. കൊവിഡ് രോഗികളുടെ എണ്ണം കൂടുതലായിരുന്ന കുട്ടമ്പുഴ പഞ്ചായത്തില്‍ ടി പി ആര്‍ കുറയ്ക്കാന്‍ സാധിച്ചിട്ടുണ്ട്
കൊച്ചി: കൊവിഡ് ടെസ്റ്റ് പോസിറ്റിവിറ്റി നിരക്ക് 30 ശതമാനത്തിനു മുകളില്‍ ആയ ചിറ്റാറ്റുകര പഞ്ചായത്ത് ഒരു ക്ലസ്റ്റര്‍ ആയി പരിഗണിച്ച് നടപടികള്‍ ശക്തിപ്പെടുത്തുമെന്ന് ജില്ലാ കലക്ടര്‍ എസ് സുഹാസ് .ജില്ലയിലെ 11 പഞ്ചായത്തുകളില്‍ ടി പി ആര്‍ 8% താഴെയാണ്. 14 പഞ്ചായത്തുകളില്‍ 20-30 % ഇടയിലാണ്. കൊവിഡ് രോഗികളുടെ എണ്ണം കൂടുതലായിരുന്ന കുട്ടമ്പുഴ പഞ്ചായത്തില്‍ ടി പി ആര്‍ കുറയ്ക്കാന്‍ സാധിച്ചിട്ടുണ്ട്. ഇവിടെ 18 വയസ്സിനു മുകളില്‍ എല്ലാവര്‍ക്കും ആദ്യ ഡോസ് വാക്‌സിന്‍ നല്‍കിയിട്ടുണ്ടെന്നും കലക്ടര്‍ പറഞ്ഞു.
ഒരു ഘട്ടത്തില്‍ ടി പി ആര്‍ നിരക്ക് ഉയര്‍ന്നിരുന്ന കുമ്പളങ്ങി പഞ്ചായത്തില്‍ വാക്‌സിനേഷന്‍ ഡ്രൈവ് നടത്തിവരികയാണ്. ജനറല്‍ ഹോസ്പിറ്റല്‍ എറണാകുളം, കളമശ്ശേരി മെഡിക്കല്‍ കോളജ്, ആലുവ താലൂക്ക് ആശുപത്രി എന്നിവിടങ്ങളില്‍ ഐസിയു സംവിധാനം ശക്തമായി തുടരുന്നുണ്ട്. പി വിഎസ് ആശുപത്രിയില്‍ നിലവില്‍ 20 പേര്‍ മാത്രമാണ് ചികില്‍സയിലുള്ളത്. ഇവിടെ ട്രീറ്റ്‌മെന്റ് അവസാനിപ്പിച്ച് ഇവിടെ ജോലി ചെയ്യുന്ന ആരോഗ്യപ്രവര്‍ത്തകരെ മറ്റ് ഹോസ്പിറ്റലിലേക്ക് മാറ്റും.
14 ലക്ഷത്തിലധികം പേര്‍ ജില്ലയില്‍ വാക്‌സിന്‍ സ്വീകരിച്ചു. നിലവില്‍ 15 സ്വകാര്യ ആശുപത്രികള്‍ വഴി വാക്‌സിന്‍ നല്‍കുന്നുണ്ടെന്നും കലക്ടര്‍ യോഗത്തില്‍ അറിയിച്ചു.കൊച്ചി കോര്‍പ്പറേഷന്റെ സഹകരണത്തോടെ തെരുവ് നിവാസികള്‍ക്ക് വേണ്ടി വാക്‌സിനേഷന്‍ ഡ്രൈവ് നടത്തിവരികയാണെന്നും കലക്ടര്‍ പറഞ്ഞു.