സ്വര്‍ണക്കടത്ത്: കരുതല്‍ തടങ്കല്‍ റദ്ദാക്കണമെന്ന റബിന്‍സിന്റെ ഹരജി തള്ളി
തുടര്‍ച്ചയായി സ്വര്‍ണം കടത്തിയെന്നതിന് റബിന്‍സിനെതിരെ തെളിവുകള്‍ ഇല്ലാത്തതിനാല്‍ കരുതല്‍ തടങ്കല്‍ റദ്ദാക്കണമെന്നായിരുന്നു ഹരജിയിലെ ആവശ്യം.എന്നാല്‍ സ്വര്‍ണക്കടത്തില്‍ റബിന്‍സിന് കൃത്യമായി പങ്കും തെളിവുമുണ്ടെന്നായിരുന്നു അന്വേഷണ ഏജന്‍സികളുടെ നിലപാട്
കൊച്ചി:തിരുവനന്തപുരം വിമാനത്താവളം വഴി നയതന്ത്ര ബാഗിലൂടെ സ്വര്‍ണം കടത്തിയ കേസില്‍ പിടിയിലാ റബിന്‍സിന്റെ കരുതല്‍ തടങ്കല്‍ റദ്ദാക്കണമെന്നാവശ്യപ്പെട്ട് നല്‍കിയ ഹരജി ഹൈക്കോടതി തള്ളി.തുടര്‍ച്ചയായി സ്വര്‍ണ്ണം കടത്തിയെന്നതിന് തെളിവുകള്‍ ഇല്ല.
ഇത് സംബന്ധിച്ച അന്വേഷണ ഏജന്‍സികളുടെ കുറ്റപത്രങ്ങളിലോ അന്വേഷണത്തിലോ കാര്യമായ തെളിവുകള്‍ ഇല്ല. ഈ സാഹചര്യത്തില്‍ കരുതല്‍ തടങ്കല്‍ നിയമവിരുദ്ധമാണെന്നും റദ്ദാക്കണമെന്നുമായിരുന്നു ഹരജിയിലെ ആവശ്യം.
എന്നാല്‍ റബിന്‍സിന് സ്വര്‍ണക്കടത്തില്‍ കൃത്യമായ പങ്കുണ്ടെന്നും അതിനുള്ള തെളിവുകള്‍ ഉണ്ടെന്നും ഇത് കോടതികളില്‍ സമര്‍പ്പിച്ചിട്ടുണ്ടെന്നുമായിരുന്നു അന്വേഷണ ഏജന്‍സികളുടെ നിലപാട്. ഇരു വിഭാഗങ്ങളുടെയും വാദങ്ങള്‍ പരിഗണിച്ച കോടതി റബിന്‍സിന്റെ ഹരജി തള്ളുകയായിരുന്നു.