ഓണ്‍ലൈന്‍ ട്രേഡിങില്‍ ലാഭം വാഗ്ദാനം ചെയ്ത് കേരള ഹൈക്കോടതി റിട്ടയേര്‍ഡ് ജഡ്ജിയുടെ 90 ലക്ഷം തട്ടിയെടുത്തു
കൊച്ചി: ഓണ്‍ലൈന്‍ തട്ടിപ്പില്‍ കുടുങ്ങി കേരള ഹൈക്കോടതി റിട്ടയേര്‍ഡ് ജസ്റ്റിസ് ശശിധരന്‍ നമ്പ്യാര്‍. 90 ലക്ഷം രൂപയാണ് നഷ്ടമായത്. ഓണ്‍ലൈന്‍ ഷെയര്‍ ട്രേഡിങ്ങിലൂടെ 850 ശതമാനം ലാഭം വാഗ്ദാനം ചെയ്തായിരുന്നു തട്ടിപ്പ്. ഡിസംബറിലാണ് സംഭവം നടന്നത്. ജഡ്ജിയുടെ പരാതിയില്‍ രണ്ടുപേര്‍ക്കെതിരെ തൃപ്പൂണിത്തുറ ഹില്‍ പാലസ് പോലിസ് കേസെടുത്തിട്ടുണ്ട്.
ഇദ്ദേഹത്തിന്റെ അനുമതിയില്ലാതെ മൊബൈല്‍ നമ്പര്‍ ഒരു വാട്‌സ്ആപ്പ് ഷെയര്‍ ട്രേഡിങ് ഗ്രൂപ്പില്‍ കൂട്ടിച്ചേര്‍ത്തിരുന്നു. പിന്നീട് ഇതുവഴി ലാഭം വാഗ്ദാനം ചെയ്താണ് തട്ടിപ്പ് നടത്തിയത്. പണം അയക്കാനുള്ള ഒരു ലിങ്ക് ഗ്രൂപ്പില്‍ പങ്കുവയ്ക്കുകയും ജഡ്ജി ഇതുവഴി പണം അയക്കുകയും ചെയ്തു. എന്നാല്‍ ഘട്ടം ഘട്ടമായി ജഡ്ജിയുടെ അക്കൗണ്ടില്‍ നിന്ന് 90 ലക്ഷം രൂപ ഇവര്‍ തട്ടിയെടുത്തുവെന്നാണ് കേസ്.