ഹജ്ജിനിടെ മരിച്ച പിതാവിന്റെ ഖബറടക്കം കഴിഞ്ഞ് മടങ്ങവെ മകന്‍ അപകടത്തില്‍ മരിച്ചു
കുവൈത്ത് സിറ്റി: ഹജ്ജിനിടെ മരിച്ച പിതാവിന്റെ ഖബറടക്കം കഴിഞ്ഞ് മടങ്ങിയ മകന്‍ അപകടത്തില്‍ മരിച്ചു. മലപ്പുറം വാഴയൂര്‍ തിരുത്തിയാട് സ്വദേശി മണ്ണില്‍കടവത്ത് മുഹമ്മദ് മാസ്റ്ററുടെ മകന്‍ റിയാസ് ആണ് വാഹനാപകടത്തില്‍ മരിച്ചത്. റിയാസും കുടുംബവും കുവൈത്തിലേക്ക് മടങ്ങിപ്പോകവെ തായിഫിന് നൂറു കിലോമീറ്റര്‍ അകലെ റിദ്വാനില്‍ വച്ച് ഇവര്‍ സഞ്ചരിച്ചിരുന്ന വാഹനം അപകടത്തില്‍ പെടുകയായിരുന്നു.
കഴിഞ്ഞ ദിവസമാണ് റിയാസ് പിതാവിന്റെ മയ്യിത്ത് മറവു ചെയ്യുന്നതിനായി കുവൈത്തില്‍നിന്ന് മക്കയിലേക്ക് എത്തിയത്. ഹജ്ജിനിടെ കാണാതായ ശേഷം മുഹമ്മദ് മാസ്റ്ററെ കഴിഞ്ഞദിവസം മരിച്ച നിലയില്‍ കണ്ടെത്തുകയായിരുന്നു. മക്ക ഗവര്‍ണറുടെ പ്രത്യേക അനുമതിയില്‍ മക്കയിലെ ജന്നത്തുല്‍ മഹല്ലയിലാണ് മുഹമ്മദ് മാസ്റ്ററെ മറവുചെയ്തത്. കഴിഞ്ഞ ജൂണ്‍ 22 മുതല്‍ മിനയില്‍നിന്നാണ് മുഹമ്മദിനെ കാണാതായത്.
ഭാര്യയുടെ കൂടെ ഹജ്ജിനെത്തിയ മുഹമ്മദിനെ പിന്നീട് കാണാതാകുകയായിരുന്നു. മലയാളി സന്നദ്ധപ്രവര്‍ത്തകര്‍ അടക്കം നിരവധി പേര്‍ ഒട്ടേറെ സ്ഥലങ്ങളില്‍ മുഹമ്മദിനെ തെരഞ്ഞെങ്കിലും കണ്ടെത്തനായിരുന്നില്ല. ഏതാനും ദിവസം മുമ്പ് അദ്ദേഹത്തിന്റെ ഭാര്യ ഹജ്ജ് കര്‍മം പൂര്‍ത്തിയാക്കി നാട്ടിലേക്ക് മടങ്ങിയിരുന്നു. കുവൈത്തിലുള്ള മക്കളായ സല്‍മാനും റിയാസും കുടുംബസമേതം മക്കയിലെത്തുകയും മൃതദേഹം തിരിച്ചറിയുകയും ചെയ്ത ശേഷമാണ് ഖബറടക്കം പൂര്‍ത്തിയാക്കിയത്.