തിരുവനന്തപുരം: സംസ്ഥാന സ്‌കൂള്‍ കായികമേളയില്‍ സ്‌കൂള്‍ വിഭാഗത്തില്‍ കോതമംഗലം സെന്റ് ജോര്‍ജിന് ജേതാക്കളായി. പത്താം തവണയാണ് സെന്റ് ജോര്‍ജ് കിരീടം നേടുന്നത്. 2014ന് ശേഷം സെന്റ് ജോര്‍ജിന്റെ ആദ്യ കിരിടനേട്ടമാണിത്. കിരീടത്തോടെ ഈ വര്‍ഷം വിരമിക്കുന്ന പരിശീലകന്‍ രാജു പോളിന് യാത്രയപ്പ് നല്‍കുകയായിരുന്നു പ്രിയശിഷ്യര്‍. പാലക്കാട് കല്ലടി സ്‌കൂളാണ് രണ്ടാം സ്ഥാനത്തെത്തിയത്. കഴിഞ്ഞ വര്‍ഷത്തെ ചാംപ്യന്‍മാരായ മാര്‍ ബേസിലിന് മൂന്നാം സ്ഥാനം നേടാനെ കഴിഞ്ഞുളളൂ. ഗവണ്‍മെന്റ് ഫിഷറീസ് എച്ച്എസ്എസ് നാട്ടിക (45), പറളി എച്ച്എസ് (32) എന്നിവരാണ് നാല്, അഞ്ച് സ്ഥാനങ്ങളില്‍.
പാലായിലെ രണ്ടാം സ്ഥാനക്കാരായിരുന്ന കോഴിക്കോട് പുല്ലൂരാംപാറ സെന്റ് ജോസഫ്‌സ് സ്‌കൂള്‍ രണ്ട് സ്വര്‍ണവും നാല് വെള്ളിയും ആറ് വെങ്കലവുമായി 28 പോയിന്റ് നേടി ആറാം സ്ഥാനത്തേക്ക് പിന്തള്ളപ്പെട്ടു.