ജഡേജയ്ക്ക് പരിക്ക്; ഓസിസിനെതിരേ കളിക്കില്ല
സ്റ്റാര്‍ക്കിന്റെ പന്ത് പ്രതിരോധിക്കുന്നതിനിടെയാണ് പരിക്കേറ്റത്.
സിഡ്‌നി: ഇന്ത്യന്‍ ഓള്‍ റൗണ്ടര്‍ രവീന്ദ്ര ജഡേജയ്ക്ക് പരിക്ക്. ഇന്ന് ഓസിസിനെതിരായ മൂന്നാം ടെസ്റ്റിന്റെ മൂന്നാം ദിനം ബാറ്റ് ചെയ്യുന്നതിനിടെയാണ് താരത്തിന് പരിക്കേറ്റത്.ഇടം കൈയ്യിലെ വിരലിനാണ് പരിക്കേറ്റത്. സ്റ്റാര്‍ക്കിന്റെ പന്ത് പ്രതിരോധിക്കുന്നതിനിടെയാണ് പരിക്കേറ്റത്. ഉടന്‍ തന്നെ താരം മെഡിക്കല്‍ സഹായം ആവശ്യപ്പെട്ടു. മല്‍സരത്തിന് ശേഷം ജഡേജയുടെ വിരല്‍ സ്‌കാന്‍ ചെയ്തിട്ടുണ്ട്. നാളെ ഓസിസിനെതിരേ നാലാം ദിനം ബൗള്‍ ചെയ്യാന്‍ ജഡേജയ്ക്ക് കഴിയുമോ എന്ന കാര്യം സംശയമാണ്. ഇന്ന് വൈകിട്ടോടെയാണ് പരിക്കിന്റെ മെഡിക്കല്‍ റിപ്പോര്‍ട്ട് പുറത്ത് വരിക. താരത്തിന് അസഹനീയമായ വേദനയുണ്ടെന്നും നാളെ കളിക്കാന്‍ സാധ്യത കുറവാണെന്നുമാണ് റിപ്പോര്‍ട്ട്. ഓസിസിന്റെ ആദ്യ ഇന്നിങ്‌സില്‍ നാല് വിക്കറ്റ് നേടിയ ജഡേജയുടെ മികവിലാണ് ഇന്ത്യ ആധിപത്യം നേടിയത്. ഇന്ത്യയുടെ ആദ്യ ഇന്നിങ്‌സില്‍ 37 പന്തില്‍ 28 റണ്‍സെടുത്ത് ജഡേജ ബാറ്റിങിലും തിളങ്ങിയിരുന്നു.