ഐഎസ്എല്‍; ബ്ലാസ്റ്റേഴ്സ് ഇന്നിറങ്ങും; എതിരാളി ഹൈദരാബാദ്; ആരാധകര്‍ക്ക് ഓഫറുമായി കൊച്ചി മെട്രോ
സ്റ്റേഡിയത്തില്‍ നിന്ന് ആലുവയിലേക്കും എസ്എന്‍ ജംഗ്ഷനിലേക്കുമുള്ള അവസാന ട്രെയിന്‍ സര്‍വ്വീസ് രാത്രി 11.30ന് ആയിരിക്കും.
കൊച്ചി: ഐഎസ്എലില്‍ ഇന്ന് കേരള ബ്ലാസ്റ്റേഴ്സ് -ഹൈദരാബാദ് എഫ്സി പോരാട്ടം. മത്സരം രാത്രി 8ന് കൊച്ചി കലൂര്‍ രാജ്യാന്തര സ്റ്റേഡിയത്തിലാണ്. സസ്‌പെന്‍ഷനിലായിരുന്ന പ്രബീര്‍ ദാസും മിലോസും തിരിച്ചെത്തും. ജവഹര്‍ലാല്‍ നെഹ്റു സ്റ്റേഡിയത്തില്‍ ഐഎസ്എല്‍ മത്സരം നടക്കുന്നതിനാല്‍ കൊച്ചി മെട്രോ ഇന്ന് അധിക സര്‍വ്വീസ് ഒരുക്കും. രാത്രി 10 മണിക്ക് ശേഷമുള്ള ടിക്കറ്റുകള്‍ക്ക് 50 ശതമാനം ഇളവാണ് മെട്രോ പ്രഖ്യാപിച്ചിരിക്കുന്നത്. ജവഹര്‍ലാല്‍ നെഹ്റു സ്റ്റേഡിയത്തില്‍ നിന്ന് ആലുവയിലേക്കും എസ്എന്‍ ജംഗ്ഷനിലേക്കുമുള്ള അവസാന ട്രെയിന്‍ സര്‍വ്വീസ് രാത്രി 11.30ന് ആയിരിക്കും.
മത്സരം കാണാനായി സ്റ്റേഡിയത്തില്‍ എത്തുമ്പോള്‍ തന്നെ മടക്കയാത്രക്കുള്ള ടിക്കറ്റും ആരാധകര്‍ക്ക് സ്വന്തമാക്കാം. ടിക്കറ്റ് വാങ്ങുന്നതിനുള്ള തിരക്ക് ഇതിലൂടെ കുറയ്ക്കാന്‍ സാധിക്കും. പൊതുജനങ്ങള്‍ക്കും മത്സരം കണ്ട് മടങ്ങുന്ന ഫുട്ബോള്‍ ആരാധകര്‍ക്കും മെട്രോ സര്‍വ്വീസ് പ്രയോജനപ്പെടുത്താം. സ്റ്റേഷനുകളിലെ തിരക്ക് നിയന്ത്രിക്കുന്നതിനായി പ്രത്യേക സജ്ജീകരണങ്ങളും തയ്യാറാക്കിയിട്ടുണ്ട്.