ഐഎസ്എല്‍; കേരളാ ബ്ലാസ്റ്റേഴ്സിന്റെ പ്ലേ ഓഫ് മോഹങ്ങള്‍ക്ക് തിരിച്ചടി; ബഗാനോട് തോല്‍വി
കൊച്ചി: ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്സിന് വീണ്ടും തോല്‍വി. മോഹന്‍ ബഗാന് എതിരില്ലാതെ മൂന്ന് ഗോളുകള്‍ക്കാണ് ബ്ലസ്റ്റേഴ്‌സിനെ തോല്‍പ്പിച്ചത്. ഇതോടെ ബ്ലാസ്റ്റേഴ്സിന്റെ പ്ലേ ഓഫ് സ്വപ്നങ്ങള്‍ക്ക് മങ്ങലേറ്റു. സ്വന്തം തട്ടകത്തില്‍ ജയം ലക്ഷ്യമിട്ടിറങ്ങിയ ബ്ലാസ്റ്റേഴ്സിന് ആദ്യം മുതല്‍ തന്നെ കാലിടറി. 28-ാം മിനിറ്റില്‍ ബ്ലാസ്റ്റേഴ്‌സിനെതിരെ ജെയ്മി മക്ലാരന്‍ ലീഡെടുത്തു. 40-ാം മിനിറ്റില്‍ ജേസണ്‍ കമ്മിങ്സിന്റെ അസിസ്റ്റില്‍ മക്ലാരന്‍ നീട്ടിയടിച്ച പന്ത് വീണ്ടും ബ്ലാസ്റ്റേഴ്സിന്റെ ഗോള്‍ വല കുലുക്കി.
66-ാം മിനിറ്റില്‍ ആല്‍ബര്‍ട്ടോ റോഡ്രിഗസ് ബഗാനായി മൂന്നാം ഗോള്‍ നേടിയതോടെ ബ്ലാസ്റ്റേഴ്സ് പരാജയത്തോടെ മടങ്ങി. മത്സരത്തില്‍ ഏറെ നേരം പന്ത് കൈവശം വച്ചത് കേരള ബ്ലാസ്റ്റേഴ്‌സായിരുന്നു. 67 ശതമാനമായിരുന്നു ബോള്‍ പൊസെഷന്‍. എന്നാല്‍ മികച്ച അവസരങ്ങള്‍ സൃഷ്ടിക്കാനോ ലഭിച്ച അവസരങ്ങള്‍ ഗോളാക്കി മാറ്റാനോ സാധിച്ചില്ല. 20 കളികളില്‍ നിന്ന് 24 പോയിന്റോടെ എട്ടാം സ്ഥാനത്താണ് ബ്ലാസ്റ്റേഴ്സ്. ഏഴ് കളികള്‍ ജയിച്ചപ്പോള്‍ 10 എണ്ണം തോറ്റു. 21 കളികളില്‍ നിന്ന് 49 പോയിന്റുമായി മോഹന്‍ ബഗാന് പട്ടികയില്‍ ഒന്നാമതാണ്.
