ഫിഫ ദ ബെസ്റ്റ്; മെസ്സി, എംബാപ്പെ, ബെന്‍സിമ ചുരുക്കപ്പട്ടികയില്‍
പുരസ്‌കാര പ്രഖ്യാപനം ഈ മാസം 27നാണ്
സൂറിച്ച്: കഴിഞ്ഞ വര്‍ഷത്തെ മികച്ച ഫുട്‌ബോള്‍ താരത്തിന് നല്‍കുന്ന ഫിഫാ ദ ബെസ്റ്റ് പുരസ്‌കാരത്തിന്റെ ചുരുക്കപ്പട്ടികയില്‍ ഇടം നേടി സൂപ്പര്‍ താരങ്ങളായ ലയണല്‍ മെസ്സി, കിലിയന്‍ എംബാപ്പെ, കരീം ബെന്‍സിമ.പുരസ്‌കാര പ്രഖ്യാപനം ഈ മാസം 27നാണ്. മികച്ച വനിതാ താരത്തിനുള്ള പുരസ്‌കാര പട്ടികയില്‍ അലക്‌സ് മോര്‍ഗന്‍ (യുഎസ്എ-സാന്‍ ഡിയോഗോ വേവ് ക്ലബ്ബ്), അലക്‌സിയ പ്യൂട്ടയാസ് (സ്‌പെയിന്‍-ബാര്‍സിലോണ ക്ലബ്ബ്), ബെത്ത് മീഡ് (ഇംഗ്ലണ്ട്-ആര്‍സനല്‍ ക്ലബ്ബ്) എന്നിവരാണുള്ളത്.
മികച്ച പരിശീലകന്‍മാരില്‍ അര്‍ജന്റീനയ്ക്കായി ലോകകപ്പ് നേടികൊടുത്ത ലയണല്‍ സ്‌കലോണി, മാഞ്ചസ്റ്റര്‍ സിറ്റിയുടെ പരിശീലകന്‍ പെപ്പ് ഗ്വാര്‍ഡിയോള, റയല്‍ മാഡ്രിഡിന്റെ കാര്‍ലോ ആന്‍സിലോട്ടി എന്നിവര്‍ സ്ഥാനം പിടിച്ചു. മികച്ച മൂന്ന് ഗോള്‍ കീപ്പര്‍മാരില്‍ അര്‍ജന്റീനയുടെ എമിലിയാനോ മാര്‍ട്ടിന്‍സിനൊപ്പം ബെല്‍ജിയത്തിന്റെ റയല്‍ മാഡ്രിഡ് ഗോള്‍ കീപ്പര്‍ കുര്‍ട്ടോയിസ്, മൊറോക്കോയുടെ യാസിനെ ബൗണൗ എന്നിവരും ഇടം പിടിച്ചിട്ടുണ്ട്.