മെസ്സിയും റൊണാള്‍ഡോയും വീണ്ടും നേര്‍ക്കുനേര്‍; സൗദിയില്‍ ഫെബ്രുവരിയില്‍ അല്‍ നസര്‍-ഇന്റര്‍മിയാമി പോര്
റിയാദ്: നീണ്ട ഇടവേളയ്ക്ക് ശേഷം ലോക ഫുട്‌ബോളിലെ ഇതിഹാസങ്ങള്‍ നേര്‍ക്ക് നേര്‍ വരുന്നു. സൂപ്പര്‍ താരങ്ങളായ ക്രിസ്റ്റ്യാനോ റൊണാള്‍ഡോയും ലയണല്‍ മെസ്സിയുമാണ് ഇടവേളയ്ക്ക് ശേഷം ഏറ്റുമുട്ടുന്നത്. റിയാദ് സീസണല്‍ കപ്പിലാണ് മെസ്സിയുടെ ഇന്റര്‍മിയാമിയും റൊണാള്‍ഡോയുടെ അല്‍ നസറും കൊമ്പുകോര്‍ക്കുന്നത്. ഇന്റര്‍ മിയാമി ജനുവരി 29-ന് അല്‍-ഹിലാലിനെയും ഫെബ്രുവരി 1-ന് റൊണാള്‍ഡോയുടെ ടീമായ അല്‍ നസറിനെയും നേരിടും.
ക്ലബ്ബിനും രാജ്യത്തിനും വേണ്ടി മെസ്സിയും റൊണാള്‍ഡോയും 35 തവണ പരസ്പരം ഏറ്റുമുട്ടിയിട്ടുണ്ട്. ഈ മത്സരങ്ങളില്‍ മെസ്സിയുടെ ടീമുകള്‍ 16 തവണ വിജയിച്ചപ്പോള്‍ റൊണാള്‍ഡോയുടെ ടീം 10 തവണ വിജയിച്ചു. ഒമ്പത് മത്സരങ്ങള്‍ സമനിലയില്‍ അവസാനിച്ചു. റൊണാള്‍ഡോയുടെ ടീമുകല്‍ക്ക് എതിരെ മെസ്സി 21 ഗോളുകളും 12 അസിസ്റ്റുകളും നേടിയിട്ടുണ്ട്. മെസ്സിയുടെ ടീമുകള്‍ക്ക് എതിരെ റൊണാള്‍ഡോ 20 ഗോളുകളും ഒരു അസിസ്റ്റും നേടിയിട്ടുണ്ട്. ഇന്റര്‍ മിയാമിക്ക് ഈ മത്സരങ്ങള്‍ കൂടാതെ ജനുവരി 19ന് എല്‍ സാല്‍വഡോര്‍ ദേശീയ ടീമിനെതിരെയും ഫെബ്രുവരി 4ന് ഹോങ്കോങ്ങില്‍ ഒരു മത്സരവും കളിക്കും.