ലോകകപ്പ് യോഗ്യത; പോര്‍ച്ചുഗലിനും ബെല്‍ജിയത്തിനും സമനിലകുരുക്ക്
ലിവര്‍പൂള്‍ താരം ഡീഗോ ജോട്ടയുടെ ഇരട്ട ഗോളിലൂടെ പോര്‍ച്ചുഗലാണ് ലീഡെടുത്തത്.
ലിസ്ബണ്‍: ലോകകപ്പ് യോഗ്യതാ മല്‍സരങ്ങളില്‍ കരുത്തരായ പോര്‍ച്ചുഗലിനും ബെല്‍ജിയത്തിനും സമനിലകുരുക്ക്. സെര്‍ബിയയാണ് പോര്‍ച്ചുഗലിനെ പിടിച്ചുകെട്ടിയത്. ലിവര്‍പൂള്‍ താരം ഡീഗോ ജോട്ടയുടെ ഇരട്ട ഗോളിലൂടെ പോര്‍ച്ചുഗലാണ് ലീഡെടുത്തത്. എന്നാല്‍ രണ്ട് ഗോള്‍ തിരിച്ചടിച്ച് സെര്‍ബിയ സമനില നേടുകയായിരുന്നു. സൂപ്പര്‍ താരം ക്രിസ്റ്റ്യാനോ റൊണാള്‍ഡോയ്ക്ക് ഈ മല്‍സരത്തിലും ടീമിനായി സ്‌കോര്‍ ചെയ്യാനായില്ല. അവസാന നിമിഷം നേടിയ താരത്തിന്റെ ഗോള്‍ റഫറി ഓഫ് സൈഡ് വിളിക്കുകയായിരുന്നു.
ലോക ഒന്നാം നമ്പര്‍ ടീമായ ബെല്‍ജിയം ചെക്ക് റിപ്പബ്ലിക്കിനോട് 1-1നാണ് സമനില വഴങ്ങിയത്. പ്രോവൂദിലൂടെ ചെക്ക് 50ാം മിനിറ്റില്‍ ലീഡെടുത്തു. തുടര്‍ന്ന് 10മിനിറ്റിനുള്ളില്‍ ഇന്റര്‍മിലാന്‍ താരം ലൂക്കാക്കുവിലൂടെ ബെല്‍ജിയം തിരിച്ചടിച്ച് തോല്‍വിയില്‍ നിന്നും രക്ഷപ്പെടുകയായിരുന്നു. മറ്റൊരു മല്‍സരത്തില്‍ തുര്‍ക്കി എതിരില്ലാത്ത മൂന്ന് ഗോളിന് നോര്‍വെയെ തോല്‍പ്പിച്ചു.