സൗദിയില്‍ കളിക്കാന്‍ കേരളമില്ല; സന്തോഷ് ട്രോഫിയില്‍ നിന്ന് പുറത്ത്
ജയിച്ചാല്‍ മാത്രമേ സെമി എന്ന നിലയ്ക്കായിരുന്നു കേരളം ഇറങ്ങിയത്.
ഭുവനേശ്വര്‍: സന്തോഷ് ട്രോഫിയില്‍ നിന്ന് നിലവിലെ ചാംപ്യന്‍മാരായ കേരളം പുറത്ത്. ഇന്ന് നടന്ന നിര്‍ണ്ണായക മല്‍സരത്തില്‍ പഞ്ചാബിനോട് സമനില വഴങ്ങിയതോടെയാണ് കേരളം പുറത്തായത്. 1-1നാണ് മല്‍സരം സമനിലയില്‍ അവസാനിച്ചത്. ജയിച്ചാല്‍ മാത്രമേ സെമി എന്ന നിലയ്ക്കായിരുന്നു കേരളം ഇറങ്ങിയത്. ഗ്രൂപ്പ് എയില്‍ പഞ്ചാബും കര്‍ണ്ണാടകയുമാണ് സെമിയില്‍ പ്രവേശിച്ചത്. കേരളത്തിനായി വിശാഖ് മോഹന്‍(24) സ്‌കോര്‍ ചെയ്തപ്പോള്‍ പഞ്ചാബിനായി കമല്‍ദീപ് ഷെയ്ഖും ഗോള്‍ നേടി. നിരവധി അവസരങ്ങള്‍ കേരളം സൃഷ്ടിച്ചെങ്കിലും പഞ്ചാബ് ഗോള്‍ കീപ്പര്‍ ഒരു ഭാഗത്ത് വിലങ്ങ് തടിയായി നിലകൊണ്ടു. മറുഭാഗത്ത് ഭാഗ്യവും ഇന്ന് ചാംപ്യന്‍മാര്‍ക്ക് അന്യം നിന്ന് പോവുകയായിരുന്നു. ചരിത്രത്തില്‍ ആദ്യമായി ഗള്‍ഫ് രാഷ്ട്രത്തില്‍ നടക്കുന്ന സന്തോഷ് ട്രോഫി സെമി കളിക്കാന്‍ കേരളം ഇല്ലാത്ത നിരാശയിലാണ് ആരാധകര്‍.