അലിയുടെ മാത്രമല്ല, ബജ്‌റംഗ് ബാലിയുടെ വോട്ടും നിങ്ങള്‍ക്കു ലഭിക്കില്ല; യോഗിക്ക് മറുപടിയുമായി മായാവതി
അലിയും ബജ്‌റംഗ് ബാലിയും ഞങ്ങള്‍ക്ക് തിരഞ്ഞെടുപ്പില്‍ മികച്ച വിജയം നല്‍കും
ബദായൂന്‍: തിരഞ്ഞെടുപ്പില്‍ അലിയുടെ മാത്രമല്ല, ബജ്‌റംഗ് ബാലിയുടെ വോട്ടും നിങ്ങള്‍ക്കു ലഭിക്കില്ലെന്നു ബിഎസ്പി നേതാവ് മായാവതി പറഞ്ഞു. എസ്പി-ബിഎസ്പി-ആര്‍എല്‍ഡി സഖ്യസ്ഥാനാര്‍ഥി ധര്‍മേന്ദ്ര യാദവിന്റെ പ്രചാരണയോഗത്തില്‍ സംസാരിക്കുന്നതിനിടെയാണ് യുപി മുഖ്യമന്ത്രി യോഗി ആദിത്യനാഥിനെതിരേ മറുപടിയുമായി രംഗത്തെത്തിയത്. ബജ്‌റംഗ് ബാലി ദലിതനാണെന്നും വനവാസിയാണെന്നും യോഗി തന്നെ നേരത്തേ പറഞ്ഞിട്ടുണ്ട്. ഞങ്ങളുടെ പൂര്‍വികരെ കുറിച്ച് ഓര്‍മിപ്പിച്ചതിനു യോഗിയോട് ഏറെ നന്ദിയുണ്ട്. അലിയും ബജ്‌റംഗ് ബാലിയും ഞങ്ങള്‍ക്ക് തിരഞ്ഞെടുപ്പില്‍ മികച്ച വിജയം നല്‍കും. കഴിഞ്ഞ തിരഞ്ഞെടുപ്പില്‍ നമോ നമോ എന്നു പറഞ്ഞവര്‍ ഇക്കുറി ജയ് ഭീം മുഴക്കി ബിജെപിയെ അധികാരത്തില്‍നിന്ന് പുറത്തെറിയുമെന്നും അത് രാജ്യത്തിന്റെ ആവശ്യമാണെന്നും മായാവതി പറഞ്ഞു.