ബംഗാളില്‍ ഭര്‍ത്താവിന് മുന്നില്‍ വച്ച് യുവതിയെ കൂട്ടബലാല്‍സംഗം ചെയ്തു
പശ്ചിമബംഗാളിലെ കല്യാണി ബാരാക്പൂര്‍ എക്‌സ്പ്രസ്‌വേയില്‍ ആണ് സംഭവം.
കൊല്‍ക്കത്ത: ഭര്‍ത്താവിന് മുന്നില്‍വച്ച് യുവതിയെ കൂട്ടബലാല്‍സംഗം ചെയ്തു. പശ്ചിമബംഗാളിലെ നോര്‍ത്ത് 24 പര്‍ഗാനാസ് ജില്ലയിലെ കല്യാണി ബാരാക്പൂര്‍ എക്‌സ്പ്രസ്‌വേയില്‍ ആണ് സംഭവം. കേസില്‍ എട്ടു പേരെ അറസ്റ്റ് ചെയ്തതായി പോലിസ് അറിയിച്ചു. ചൊവ്വാഴ്ച്ച രാത്രി ബൈക്കില്‍ യാത്ര ചെയ്യുകയായിരുന്ന ദമ്പതികളെ ഒരു സംഘം തടഞ്ഞു നിര്‍ത്തി ഉപദ്രവിക്കുകയായിരുന്നു. അടുത്ത ദിവസം രാവിലെയാണ് പോലിസില്‍ പരാതി നല്‍കിയത്.
'ആദ്യം പോലീസ് നാലുപേരെ അറസ്റ്റ് ചെയ്തു. ചോദ്യം ചെയ്യലില്‍ അവര്‍ നല്‍കിയ വിവരങ്ങളുടെ അടിസ്ഥാനത്തില്‍, കുറ്റകൃത്യത്തില്‍ ഉള്‍പ്പെട്ടതായി ആരോപിക്കപ്പെടുന്ന നാല് പേരെ കൂടി ഞങ്ങള്‍ അറസ്റ്റ് ചെയ്തു'- പോലീസ് അറിയിച്ചു. അറസ്റ്റിലായ എട്ടു പേരെയും കൂടുതല്‍ ചോദ്യം ചെയ്യാനായി പോലിസ് കസ്റ്റഡിയില്‍ വിട്ടിട്ടുണ്ട്.
'തെളിവുകള്‍ ശേഖരിക്കുന്നതിനായി ഫോറന്‍സിക് വിദഗ്ധരുടെ ഒരു സംഘം കുറ്റകൃത്യം നടന്ന സ്ഥലത്ത് എത്തി. ശേഖരിച്ച തെളിവുകളുടെ അടിസ്ഥാനത്തിലായിരിക്കും തുടര്‍ നടപടി. അന്വേഷണം ഇപ്പോഴും തുടരുകയാണ്'-ഉദ്യോഗസ്ഥന്‍ പറഞ്ഞു.