ദിവ്യയുടെ ജാമ്യം റദ്ദാക്കാന്‍ എഡിഎമ്മിന്റെ ഭാര്യ ഹൈക്കോടതിയെ സമീപിക്കും
നവീന്‍ ബാബുവിന്റെ മരണത്തിലെ ഗൂഡാലോചന അന്വേഷിക്കണമെന്നും ഹരജിയില്‍ ആവശ്യപ്പെടും.
കൊച്ചി: പി പി ദിവ്യയുടെ ജാമ്യം റദ്ദാക്കാന്‍ ഹൈക്കോടതിയെ സമീപിക്കുമെന്ന് എഡിഎം നവീന്‍ ബാബുവിന്റെ ഭാര്യ മഞ്ജുഷ. ദിവ്യക്ക് ജാമ്യം നല്‍കിയ തലശേരി സെഷന്‍സ് കോടതി വിധി വസ്തുതകള്‍ പരിശോധിക്കാതെയാണെന്ന് ചൂണ്ടിക്കാട്ടിയാണ് അപ്പീല്‍ നല്‍കുക. നവീന്‍ ബാബുവിന്റെ മരണത്തിലെ ഗൂഡാലോചന അന്വേഷിക്കണമെന്നും ഹരജിയില്‍ ആവശ്യപ്പെടും.
തഹസില്‍ദാര്‍ പദവയില്‍നിന്ന് മാറ്റം വേണമെന്ന് ആവശ്യപ്പെട്ട് മഞ്ജുഷ റവന്യൂവകുപ്പിന് അപേക്ഷ നല്‍കി. സ്വതന്ത്രവും ഗൗരവമേറിയതും ഏറെ ഉത്തരവാദിത്വമുള്ളതുമാണ് തഹസില്‍ദാല്‍ ജോലി. ഇത് നിറവേറ്റാനുള്ള മാനസികാവസ്ഥയിലൂടെയല്ല കടന്നുപോകുന്നതെന്നും സമാന പദവിയായ കലക്ടറേറ്റിലെ സീനിയര്‍ സൂപ്രണ്ട് തസ്തികയിലേക്ക് മാറ്റിത്തരണമെന്നുമാണ് അപേക്ഷയിലുള്ളത്. നിലവില്‍ കോന്നി തഹസില്‍ദാരാണ് മഞ്ജുഷ. അവധി കഴിഞ്ഞ് ഡിസംബര്‍ ആദ്യവാരം ജോലിയില്‍ തിരികെ പ്രവേശിക്കേണ്ടതുമാണ്. ഈ സാഹചര്യത്തിലാണ് പദവി മാറ്റിത്തരണമെന്ന അപേക്ഷ മഞ്ജുഷ റവന്യൂവകുപ്പിന് നല്‍കിയിരിക്കുന്നത്.