ശില്‍പ ഷെട്ടിയും ഭര്‍ത്താവ് രാജ് കുന്ദ്രയും 1.5 കോടി രൂപ തട്ടിയെടുത്തതായി പരാതി; പോലിസ് എഫ്‌ഐആര്‍ രജിസ്റ്റര്‍ ചെയ്തു
നിതിന്‍ ബറായി എന്നയാളുടെ പരാതിയില്‍ ബാന്ദ്ര പോലിസാണ് ഇരുവര്‍ക്കുമെതിരേ കേസെടുത്തത്.
മുംബൈ: ബോളിവുഡ് നടി ശില്‍പ ഷെട്ടിക്കും ഭര്‍ത്താവ് രാജ് കുന്ദ്രക്കുമെതിരെ വഞ്ചനാകേസ് രജിസ്റ്റര്‍ ചെയ്ത് പോലിസ്.നിതിന്‍ ബറായി എന്നയാളുടെ പരാതിയില്‍ ബാന്ദ്ര പോലിസാണ് ഇരുവര്‍ക്കുമെതിരേ കേസെടുത്തത്.
2014ല്‍ എസ്എഫ്എല്‍ ഫിറ്റ്‌നസ് ഡയറക്ടര്‍ കാസിഫ് ഖാന്‍, ശില്‍പ ഷെട്ടി, രാജ് കുന്ദ്ര എന്നിവര്‍ ലാഭം നല്‍കാമെന്ന് വാഗ്ദാനം ചെയ്തു 1.5 കോടി രൂപ നിക്ഷേപമായി സ്വീകരിച്ചെന്നും എന്നാല്‍ വാഗ്ദാനങ്ങള്‍ നടപ്പാക്കിയില്ലെന്നുമാണ് പരാതി.
എസ്എഫ്എല്‍ ഫിറ്റ്‌നസ് കമ്പനി ഒരു ഫ്രാഞ്ചൈസി അനുവദിക്കാമെന്നും ഡഹാസ്പര്‍, കൊറേഗാവ് എന്നിവിടങ്ങളില്‍ ജിം, സ്പാ എന്നിവ ആരംഭിക്കാന്‍ സഹായിക്കാമെന്ന് വാഗ്ദാനം ചെയ്തിരുന്നെന്നും പരാതിയിലുണ്ട്.
വാഗ്ദാനങ്ങള്‍ നടപ്പാകാതിരുന്നപ്പോള്‍ പണം തിരികെ ചോദിച്ചെങ്കിലും ഇവര്‍ ഭീഷണിപ്പെടുത്തിയെന്നും പരാതിക്കാരന്‍ ആരോപിച്ചു.
ഐപിസി 420, 120ബി, 506, 34 വകുപ്പുകള്‍ പ്രകാരം എഫ്‌ഐആര്‍ രജിസ്റ്റര്‍ ചെയ്തതായി പോലിസ് പറഞ്ഞു. ശില്‍പ ഷെട്ടിയുടെ ഭര്‍ത്താവ് രാജ് കുന്ദ്രക്കെതിരേ നീലച്ചിത്ര നിര്‍മാണ കേസ് നിലവിലുണ്ട്. ഏറെ നാളത്തെ ജയില്‍വാസത്തിന് ശേഷം ഈയടുത്താണ് രാജ് കുന്ദ്ര ജയിലില്‍ നിന്ന് പുറത്തിറങ്ങിയത്.