കെ സി വേണുഗോപാലിന്റെ വീട്ടില്‍ മോഷണം; ലെറ്റര്‍പാഡും ചെക്ക്ലീഫുകളും നഷ്ടമായി

ആലപ്പുഴ: എ.ഐ.സി.സി. ജനറല്‍സെക്രട്ടറി കെ സി വേണുഗോപാല്‍ എം.പി.യുടെ ആലപ്പുഴയിലെ ഔദ്യോഗിക ഓഫീസായി പ്രവര്‍ത്തിക്കുന്ന വീട്ടില്‍ മോഷണം. ജനല്‍ക്കമ്പികള്‍ ഇളക്കിമാറ്റി അകത്തുകടന്ന മോഷ്ടാക്കള്‍ ലെറ്റര്‍പാഡ്, ചെക്ക്ലീഫുകള്‍, വാച്ചുകള്‍, ഫയലുകള്‍ എന്നിവ കവര്‍ന്നു. ഓഫീസ് മുറിയിലെയും കിടപ്പുമുറിയിലെയും അലരമാരകളിലെ ഫയലുകള്‍ അലങ്കോലമാക്കി.സ്റ്റാഫംഗം അജ്മല്‍ വെള്ളിയാഴ്ച രാവിലെ പതിനൊന്നോടെ എത്തിയപ്പോഴാണു വിവരമറിയുന്നത്. വ്യാഴാഴ്ച രാത്രി 11.30 വരെ അജ്മലും യൂത്ത് കോണ്‍ഗ്രസ് അമ്പലപ്പുഴ ബ്ലോക്ക് പ്രസിഡന്റ് നൂറുദ്ദീന്‍ കോയയും വീട്ടിലുണ്ടായിരുന്നു. ഇവര്‍ പോയശേഷമാണു മോഷണം നടന്നത്.

വീടിന്റെ പിന്‍ഭാഗത്തെ ജനല്‍ക്കമ്പികള്‍ ഇളക്കിയാണു കള്ളന്‍ അകത്തുകടന്നത്. ലാപ്‌ടോപ്പും മൊബൈല്‍ഫോണും കവര്‍ന്നെന്നാണു ജീവനക്കാര്‍ ആദ്യം കരുതിയതെങ്കിലും പരിശോധനയില്‍ ഇവ നഷ്ടമായില്ലെന്നു വ്യക്തമായി. പോലിസും വിരലടയാളവിദഗ്ധരും ഡോഗ്‌സ്‌ക്വാഡും പരിശോധന നടത്തി. മണംപിടിച്ച പോലിസ് നായ കളര്‍കോട് ഭാഗത്തേക്കാണ് ഓടിയത്. ആലപ്പുഴ കൈതവന വാര്‍ഡിലാണ് വീട്. ഇതിനുസമീപമുള്ള രണ്ടു വീടുകളില്‍ അടുത്തിടെ മോഷണം നടന്നിരുന്നു.

പകല്‍ വീട്ടമ്മയുടെ കഴുത്തില്‍ കയര്‍മുറുക്കി നാലരപ്പന്റെ സ്വര്‍ണം കവര്‍ന്നതാണ് ആദ്യ സംഭവം. പിന്നാലെ മറ്റൊരുവീട്ടില്‍നിന്ന് 20 പവന്‍ സ്വര്‍ണവും മോഷണം പോയി. രണ്ടുസംഭവങ്ങളിലെയും പ്രതികളെ പിടിക്കാന്‍ പോലീസിനു കഴിഞ്ഞിട്ടില്ല.

വേണുഗോപാല്‍ ആലപ്പുഴ എം.എല്‍.എ. ആയിരുന്നപ്പോഴാണ് രാജീവം എന്ന വീട് വാടകയ്‌ക്കെടുത്തത്. പിന്നീട് ഡല്‍ഹിയിലേക്കു പോയെങ്കിലും ഈ വീട് ക്യാമ്പ് ഓഫീസായി പ്രവര്‍ത്തിക്കുകയായിരുന്നു. എച്ച്. സലാം എം.എല്‍.എ. വീടുസന്ദര്‍ശിച്ചു.