സ്‌കൂട്ടറും പിക്കപ്പ് വാനും കൂട്ടിയിടിച്ച് കോളജ് വിദ്യാര്‍ഥി മരിച്ചു

കണ്ണൂര്‍: സ്‌കൂട്ടറും പിക്കപ്പ് വാനും കൂട്ടിയിടിച്ച് കോളജ് വിദ്യാര്‍ഥി മരിച്ചു. വേങ്ങാട് കുരിയോട് ജാസ്മിന്‍ ഹൗസില്‍ ടി കെ അബ്ദുല്‍ റസാഖിന്റെയും സലീനയുടെയും മകന്‍ കെ ടി റസല്‍ (19) ആണ് മരിച്ചത്. ചാലോടിനടുത്ത് മുട്ടന്നൂര്‍ കോണ്‍കോഡ് കോളജിലെ ഒന്നാം വര്‍ഷം ഡിഗ്രി വിദ്യാര്‍ഥിയാണ്. വ്യാഴാഴ്ച രാവിലെ ഒമ്പതോടെ പനയത്താം പറമ്പിനടുത്ത് മത്തിപ്പാറയില്‍ വെച്ചായിരുന്നു അപകടം. കോളേജിലേക്ക് പോകുന്നതിനിടെ റസല്‍ സഞ്ചരിച്ച സ്‌കൂട്ടറും പിക്കപ്പ് വാനും കൂട്ടിയിടിക്കുകയായിരുന്നു. കണ്ണൂര്‍ കിംസില്‍ ചികിത്സയിലിരിക്കെയാണ് ഇന്നലെ രാത്രിയോടെ മരണമടഞ്ഞത്. സഹോദരന്‍: റയാന്‍ (വട്ടിപ്രം യു പി സ്‌കൂള്‍ വിദ്യാര്‍ഥി).