നിര്‍ദ്ധന കുടുംബത്തിന് പിന്തുണയുമായി മനുഷ്യാവകാശ കമ്മീഷന്‍

കോഴിക്കോട്: രണ്ടേകാല്‍ സെന്റ് സ്ഥലത്ത് ചോര്‍ന്നൊലിക്കുന്ന വീട്ടില്‍ ദുരിതം പേറി ജീവിക്കുന്ന നിര്‍ദ്ധന കുടുംബത്തിന് പിന്തുണയുമായി മനുഷ്യാവകാശ കമ്മീഷന്‍. മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ ബൈജുനാഥിന്റെ നിര്‍ദ്ദേശാനുസരണം ചേളന്നൂര്‍ ഗ്രാമപഞ്ചായത്താണ് നിര്‍ദ്ധന കുടുംബത്തിന്റെ സംരക്ഷണം ഉറപ്പാക്കിയത്.

കമ്മീഷന്‍ നിര്‍ദ്ദേശമനുസരിച്ച് പഞ്ചായത്ത് ഉദ്യോഗസ്ഥര്‍ പരാതിക്കാരനായ ചേളന്നൂര്‍ സ്വദേശി പി രാമന്റെ വീട് സന്ദര്‍ശിച്ചു. പഞ്ചായത്തിന്റെ പിന്തുണ കുടുംബത്തിന് വാഗ്ദാനം ചെയ്തു. വീട് നന്നാക്കാന്‍ അപേക്ഷ നല്‍കുന്നതിന് നിര്‍ദ്ദേശം നല്‍കി.

അയല്‍വാസികളും റസിഡന്‍സ് അസോസിയേഷനും കുടുംബത്തിന് സഹായം നല്‍കുന്നുണ്ട്. പരാതിക്കാരന്‍ ഹ്യദയസംബന്ധമായ രോഗങ്ങള്‍ കാരണം ദുരിതം അനുഭവിക്കുന്നയാളാണ്. സാമൂഹിക സുരക്ഷാ പെന്‍ഷന്‍ ലഭിക്കുന്നുണ്ട്. പഞ്ചായത്തിന്റെ നടപടികള്‍ കമ്മീഷന്‍ ശ്ലാഘിച്ചു. യഥാസമയം സഹായങ്ങള്‍ നല്‍കി പരാതിക്കാരന്റെ കുടുംബത്തിന് ആശ്വാസം നല്‍കണമെന്ന് കമ്മീഷന്‍ ആവശ്യപ്പെട്ടു.