ലോറി മരത്തിലിടിച്ചു; വാഹനത്തില്‍ കുടുങ്ങിയ ഡ്രൈവറെ രണ്ടുമണിക്കൂറിനു ശേഷം രക്ഷപ്പെടുത്തി

തിരൂരങ്ങാടി: ദേശീയപാത കക്കാട് നിയന്ത്രണം വിട്ട ലോറി മരത്തിലിടിച്ച് ഡ്രൈവര്‍ രണ്ടു മണിക്കൂറോളം വാഹനത്തില്‍ കുടുങ്ങി. കക്കാട് കാച്ചടിയില്‍ ഇന്ന് പുലര്‍ച്ചെ 3.30ഓടെയാണ് അപകടം. ആലപ്പുഴയില്‍ നിന്ന് കോഴിക്കോട്ടേക്ക് പോവുകയായിരുന്ന ടോറസ് ലോറിയാണ് അപകടത്തില്‍ പെട്ടത്. മരത്തില്‍ ഇടിച്ചതിനെ തുടര്‍ന്ന് ഡ്രൈവര്‍ ലോറിക്കുള്ളില്‍ അകപ്പെടുകയായിരുന്നു. നാട്ടുകാരും പോലിസും ഏറെനേരം രക്ഷാപ്രവര്‍ത്തനം നടത്തിയെങ്കിലും പുറത്തെത്തിക്കാനായില്ല.

താനൂരില്‍ നിന്നും തിരുരൂരില്‍ നിന്നും ഫയര്‍ ഫോഴ്‌സ് യൂനിറ്റും എത്തി. തുടര്‍ന്ന് നാട്ടുകാരുടെയും പോലിസിന്റയും ഫയര്‍ഫോഴ്‌സിന്റെയും രണ്ട് മണിക്കൂറോളം നീണ്ട പരിശ്രമത്തിനൊടുവിലാണ് രക്ഷപ്പെടുത്തിയത്. പരിക്കേറ്റ ഡ്രൈവര്‍ കൊല്ലം അഞ്ചല്‍ സ്വദേശി രാജേഷി(42)നെ കോട്ടക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചു.