ഗുജറാത്തില്‍ കൊറോണ ബാധിച്ച് 14 മാസം പ്രായമുള്ള കുഞ്ഞ് മരിച്ചു

അഹമ്മദാബാദ്:കൊറോണ വൈറസ് ബാധയെതുടര്‍ന്ന് ചികില്‍സയിലായിരുന്ന 14 മാസം പ്രായമായ കുഞ്ഞ് മരിച്ചു. ഗുജറാത്തിലെ ജാംനഗറിലാണ് നാടിനെ നടുക്കിയ മരണമുണ്ടായത്. ജാംനഗറിലെ ഗവണ്‍മെന്റ് ആശുപത്രിയില്‍ ഇന്നലെ വൈകീട്ടോടെയായിരുന്നു മരണം. ഗുരുതരാവസ്ഥയിലായതിനാല്‍ വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തിയിരുന്നത്. ഈ മാസം അഞ്ചിനാണ് കുട്ടിക്ക് കൊറോണ സ്ഥിരീകരിച്ചത്.വൈറസ് ബാധയെതുടര്‍ന്ന് ആന്തരികാവയവങ്ങളുടെ പ്രവര്‍ത്തനം നിലച്ചതാണ് മരണത്തിലേക്ക് നയിച്ചതെന്ന് ആശുപത്രി വൃത്തങ്ങള്‍ അറിയിച്ചു.കുടിയേറ്റ തൊഴിലാളികളാണ് കുഞ്ഞിന്റെ മാതാപിതാക്കള്‍. ഇവര്‍ അടുത്തിടെ മറ്റിടങ്ങളിലേക്ക് യാത്ര ചെയ്തിട്ടില്ല. ഇതോടെ കൊറോണ ബാധിച്ച് ഗുജറാത്തില്‍ മരിച്ചവരുടെ എണ്ണം 16 ആയി.