കൊവിഡ്‌ 19: രാജ്യത്ത്‌ 37,724 പേര്‍ക്കു കൂടി രോഗബാധ, ആകെ രോഗികള്‍ 12 ലക്ഷത്തിലേക്ക്‌

ന്യൂഡല്‍ഹി: കഴിഞ്ഞ 24 മണിക്കൂറിനുള്ളില്‍ 37,724 പേര്‍ക്കു കൂടി കൊവിഡ്‌ സ്ഥിരീകരിച്ചതോടെ രാജ്യത്തെ ആകെ രോഗബാധിതരുടെ എണ്ണം 12 ലക്ഷത്തോടടുത്തു. ഇന്നലെ മാത്രം രോഗബാധ മൂലം 648 പേര്‍ക്ക്‌ ജീവന്‍ നഷ്ടപ്പെട്ടിട്ടുണ്ട്‌.

കേന്ദ്ര ആരോഗ്യ കുടുംബക്ഷേമ മന്ത്രാലത്തിന്റെ കണക്കുപ്രകാരം രാജ്യത്ത്‌ കൊവിഡ്‌ ബാധിച്ചവരുടെ എണ്ണം 11,92,915 ആയി. 4,11,133 പേരാണ്‌ വിവിധ ആശുപത്രികളില്‍ ചികില്‍സയിലുള്ളത്‌. 7,53,050 പേരുടെ രോഗം ഭേദമായി 28,732 പേര്‍ക്ക്‌ രോഗബാധ മൂലം ജീവന്‍ നഷ്ടപ്പെട്ടു.

മഹാരാഷ്ട്രയിലാണ്‌ ഇപ്പോഴും ഏറ്റവും കൂടുതല്‍ രോഗികളുള്ളത്‌. സംസ്ഥാനത്ത്‌ രോഗികളുടെ എണ്ണം 3,27,031 ആണ്‌. 12,276 പേര്‍ രോഗത്തിന്‌ കീഴടങ്ങി.

തമിഴ്‌നാടാണ്‌ രണ്ടാം സ്ഥാനത്ത്‌. 1,80.643 പേര്‍ക്കാണ്‌ രോഗം സ്ഥിരീകരിച്ചത്‌. മൂന്നാം സ്ഥാനത്തുള്ള ഡല്‍ഹിയില്‍ 1,25,096 പേര്‍ക്ക്‌ രോഗം സ്ഥിരീകരിച്ചു.

ആന്ധ്ര പ്രദേശ്‌ (58,668), കര്‍ണാടക(71,069), തെലങ്കാന(47,705)എന്നീ സംസ്ഥാനങ്ങളാണ്‌ തൊട്ടടുത്ത സ്ഥാനങ്ങളില്‍.