'അഞ്ച് ദിവസം പാഴായി'; പാര്‍ലമെന്റ് ചര്‍ച്ചകള്‍ അര്‍ത്ഥവത്തല്ലെന്ന് കോണ്‍ഗ്രസ് നേതാവ് മല്ലികാര്‍ജുന്‍ ഖാര്‍ഗെ

ന്യൂഡല്‍ഹി: ജൂലൈ 18ന് മണ്‍സൂണ്‍ സമ്മേളനം ആരംഭിച്ചതിന് ശേഷം സഭയില്‍ അര്‍ത്ഥവത്തായ ഒരു ചര്‍ച്ചയും നടന്നിട്ടില്ലെന്നും പാര്‍ലമെന്റിന്റെ അഞ്ച് ദിവസം പാഴായെന്നും കോണ്‍ഗ്രസ് നേതാവ് മല്ലികാര്‍ജുന്‍ ഖാര്‍ഗെ.

'സര്‍ക്കാര്‍ ഇതുവരെ പ്രതിപക്ഷത്തെ ചര്‍ച്ചയ്ക്ക് വിളിച്ചിട്ടില്ല, സഭയില്‍ ചര്‍ച്ചയ്ക്ക് സര്‍ക്കാര്‍ തയ്യാറല്ലെന്ന് വ്യക്തമാണ്. പാര്‍ലമെന്റിന്റെ വര്‍ഷകാല സമ്മേളനത്തിന്റെ 5 ദിവസത്തെ സമ്മേളനങ്ങള്‍ പാഴായി,' മല്ലികാര്‍ജുന്‍ ഖാര്‍ഗെ മാധ്യമങ്ങളോട് പറഞ്ഞു. സുപ്രധാന വിഷയങ്ങളില്‍ സഭയില്‍ ചര്‍ച്ച നടക്കാത്തത് രാജ്യത്തിന് വലിയ നഷ്ടമാണെന്ന് ഖാര്‍ഗെ ചൂണ്ടിക്കാട്ടി.

'ജനാധിപത്യത്തില്‍ വിശ്വസിക്കുന്നവര്‍ക്ക് ഇത് ഞെട്ടലുണ്ടാക്കി. സഭ നടത്തിപ്പ് സര്‍ക്കാരിന്റെ ഉത്തരവാദിത്തമാണ്. സുഗമമായി കാര്യങ്ങള്‍ നടക്കാന്‍ സര്‍ക്കാര്‍ എല്ലാ ശ്രമങ്ങളും നടത്തണം.. പക്ഷേ, പ്രശ്‌നപരിഹാരത്തിന് സര്‍ക്കാര്‍ ഒരു യോഗം പോലും വിളിച്ചിട്ടില്ല-' അദ്ദേഹം പറഞ്ഞു.

'ലോക്‌സഭയും രാജ്യസഭയും ഒരുമിച്ച് തീരുമാനമെടുത്ത് പരിഹാരം കണ്ടെത്തിയ ശേഷം ചര്‍ച്ച ആരംഭിക്കണം, എന്നാല്‍ 267 പ്രകാരം ചര്‍ച്ചയില്ലെന്ന് സര്‍ക്കാര്‍ ശഠിക്കുന്നു'-ഇരുസഭകളും പരസ്പരം ചര്‍ച്ച ചെയ്ത് കാര്യങ്ങള്‍ തീരുമാനിക്കണമെന്ന് അദ്ദേഹം നിര്‍ദ്ദേശിച്ചു.

വിലക്കയറ്റം, വിലക്കയറ്റം, നിത്യോപയോഗ സാധനങ്ങളുടെ ജിഎസ്ടി വര്‍ധന തുടങ്ങിയ വിഷയങ്ങളില്‍ പ്രതിപക്ഷ അംഗങ്ങളുടെ ബഹളത്തിനിടയില്‍ രാജ്യസഭാ നടപടികള്‍ വെള്ളിയാഴ്ച ഉച്ചയ്ക്ക് 2.30 വരെ നിര്‍ത്തിവച്ചപ്പോള്‍ ലോക്‌സഭ ഉച്ചയ്ക്ക് 2 മണി വരെ നിര്‍ത്തിവച്ചു.

സമ്മേളനം ആരംഭിച്ചതുമുതല്‍ ഇരുസഭകളും തുടര്‍ച്ചയായി പ്രക്ഷുബ്ദമാണ്. സുപ്രധാനവിഷയങ്ങളില്‍ പ്രതിപക്ഷത്തിന്റെ നിര്‍ദേശപ്രകാരം ചര്‍ച്ച അനുവദിക്കാന്‍ സര്‍ക്കാര്‍ തയ്യാറാവാത്തത് പ്രതിഷേധമുണ്ടായിട്ടുണ്ട്.