യുവതിക്ക് 'ഹലോ' സന്ദേശം അയച്ച യുവാവിനെ ഗുണ്ട കെട്ടിയിട്ട് മര്‍ദിച്ചു

ആലപ്പുഴ: യുവതിക്ക് ഇന്‍സ്റ്റഗ്രാമില്‍ 'ഹലോ' അയച്ചതിനു യുവാവിനെ കെട്ടിയിട്ടു മര്‍ദ്ദിച്ചു. അരൂക്കുറ്റിയിലാണ് യുവാവിനെ തട്ടിക്കൊണ്ടുപോയി കെട്ടിയിട്ടു മര്‍ദ്ദിച്ചത്. മര്‍ദനമേറ്റ അരുക്കുറ്റി പഞ്ചായത്ത് കണിച്ചിക്കാട് ജിബിന്റെ (29) വാരിയെല്ലൊടിഞ്ഞ് ശ്വാസകോശത്തിനു ക്ഷതമേറ്റു. ഗുരുതര പരുക്കുകളോടെ ജിബിനെ ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

നിരവധി കേസുകളില്‍ പ്രതിയായ പ്രഭിജിത്, കൂട്ടാളി സിന്തല്‍ എന്നിവര്‍ ചേര്‍ന്നാണു മര്‍ദിച്ചതെന്ന് ജിബിന്റെ സഹോദരന്‍ ലിബിന്‍ മനോരമ ന്യൂസിനോടു പറഞ്ഞു. കാറിലെത്തിയ രണ്ടുപേര്‍ അരൂക്കുറ്റി പാലത്തിനു സമീപത്തുനിന്നാണ് ജിബിനെ കയറ്റിക്കൊണ്ടുപോയി മാത്താനം ക്ഷേത്രത്തിനു സമീപത്തെ വീട്ടിലെത്തിച്ചു മര്‍ദിച്ചത്. മര്‍ദ്ദിച്ച യുവാവിന്റെ പെണ്‍സുഹൃത്തിന് മെസേജ് അയച്ച സംഭവവുമായി ബന്ധപ്പെട്ടാണ് ആക്രമണമെന്ന് പൂച്ചാക്കല്‍ പൊലീസ് അറിയിച്ചു.