ചരിത്രം പുല്‍ച്ചാടിയിലൂടെ

ഡോ. ധനീഷ് ഭാസ്‌കര്‍

മലബാറും, മലബാറിലെ മുസ്‌ലിംകളും 1940 ല്‍ പുല്‍ച്ചാടിയിലൂടെ ഒരു ബ്രിട്ടീഷ് ഗവേഷകനാല്‍ ആദരിക്കപ്പെട്ടിട്ടുണ്ട്. 1936 - 1939 കാലഘട്ടത്തില്‍ പശ്ചിമഘട്ടത്തില്‍ ബ്രിട്ടീഷ് നാച്ചുറല്‍ ഹിസ്റ്ററി മ്യൂസിയവും കൊളംബോ നാച്ചുറല്‍ ഹിസ്റ്ററി മ്യൂസിയവും ചേര്‍ന്ന് നടത്തിയ പര്യവേഷണത്തില്‍ കേരളത്തിലെ നിലമ്പൂര്‍ ഭാഗത്തു നിന്നും തമിഴ്‌നാട്ടിലെ ആനമലടോപ്സ്ലിപ്പില്‍ നിന്നുമായി കണ്ടെത്തിയ രണ്ടു പുല്‍ച്ചാടികള്‍ ഉള്‍പ്പെടുന്ന ജനുസ്സിന് GM Henry [George Morrison Reid Henry (Sri Lanka, 1891 – England, 1983)] എന്ന ഗവേഷകന്‍ പേര് നല്‍കിയത് 'MOPLA'എന്നാണ്!. പേര് സൂചിപ്പിക്കുന്നത് പോലെ തന്നെ നമ്മുടെ നാട്ടിലെ മാപ്ലമാര്‍ക്കുള്ള ആദരം ആയിരുന്നു അത്.

ഗവേഷണത്തിന്റെ ഭാഗമായി 2016 ല്‍ British Natural History Museum London UK (BNHM UK) സന്ദര്‍ശിച്ചപ്പോള്‍, ലോകത്തിന്റെ പല ഭാഗങ്ങളിലായി ഉണ്ടായിരുന്ന ബ്രിട്ടീഷ് കോളനികളില്‍ നിന്നും അവര്‍ ശേഖരിച്ച അമൂല്യമായ നിധിപോലെ സംരക്ഷിച്ചു വരുന്ന ജീവികളുടെ t'ype specimens' കാണുവാനും അവയെ കുറിച്ച് പഠിക്കാനും അവസരം ലഭിച്ചിരുന്നു. നമ്മുടെ ഇന്ത്യയില്‍ നിന്നും സായിപ്പ് കണ്ടെത്തി സൂക്ഷിച്ചു വെച്ചിരിക്കുന്ന ഷഡ്പദങ്ങള്‍, അവയില്‍ തന്നെ പുല്‍ച്ചാടികളുടെ ശേഖരം, കണ്ടും പഠിച്ചും തീര്‍ക്കാവുന്നതിലും അപ്പുറം ആണ്. ഒരുപക്ഷെ അവിടെ ആയതു കൊണ്ട് മാത്രം ഇന്നും 100 വര്‍ഷത്തിന് മേലെ പഴക്കമുള്ള സ്‌പെസിമന്‍സ് വരെ കേടുകൂടാതെ അതി മനോഹരമായി നിലനില്‍ക്കുന്നു.

BNHM UK പുല്‍ച്ചാടി ശേഖരത്തിലെ മറ്റ് പുല്‍ച്ചാടികളെക്കാള്‍ രൂപം, നിറം, ശരീരത്തിലെ സ്വര്‍ണ നിറത്തില്‍ ഉള്ള പുള്ളികള്‍ എന്നിവ കൊണ്ട് വ്യത്യസ്തരായ രണ്ടു പുല്‍ച്ചാടികളെ ശ്രദ്ധയില്‍പ്പെട്ടിരുന്നു. Mopla guttata & Mopla rubra (Henry, 1940) എന്ന ശാസ്ത്ര നാമത്തില്‍ കടും ചുവപ്പ് നിറത്തില്‍ ശരീരം മുഴുവന്‍ സ്വര്‍ണ പുള്ളികള്‍ ഉള്ള രണ്ട് പുല്‍ച്ചാടികള്‍!.

1938 ല്‍ നെടുംകയംനിലമ്പുര്‍ ഭാഗത്ത് നിന്നും കണ്ടെത്തിയ Mopla rubra യും , 1939 ല്‍ തമിഴ്‌നാട്ടിലെ ആനമലടോപ്സ്ലിപ്പില്‍ ഭാഗത്തു നിന്നും കണ്ടെത്തിയ Mopla guttata യും. രണ്ടും പെണ്‍ പുല്‍ച്ചാടികള്‍ ആയിരുന്നു. അവയെ കണ്ടു പിടിച്ചു പേരിട്ട Henry യും പുല്‍ച്ചാടി പഠനമേഖലയില്‍ തലതൊട്ടപ്പനായ Sir Boris P Uvarov ഉം തമ്മില്‍ Mopla sb കുറിച്ച് നടന്ന ഒരു ചര്‍ച്ചയുടെ വിഷദാംശങ്ങളും രസമുള്ളതായിരുന്നു. 'മോപ്ല' ഇന്ത്യ ഉള്‍പ്പെടുന്ന Old-World മേഖലയില്‍ കാണുന്ന പുല്‍ച്ചാടികളോട് സാമ്യം ഉള്ളതല്ല എന്നും, രൂപത്തിലും, നിറത്തിലും, ശരീരത്തിലെ പുള്ളികളിലും അവ Netoropical മേഖലയില്‍ ഉള്ള പുല്‍ച്ചാടികളോട് സാമ്യം ഉള്ളതാണെന്നും ആയിരുന്നു അവരുടെ സംശയം. പക്ഷെ, കയ്യില്‍ ഉള്ള പെണ്‍ പുല്‍ച്ചാടികളുടെ സ്‌പെസിമന്‍ ഉപയോഗിച്ച് ഈ സംശയം നീക്കാന്‍ കഴിയില്ല എന്നും, ഒരു ആണ്‍ 'മോപ്ല' യെ കിട്ടിയാല്‍ കൂടുതല്‍ പഠനം തുടരാം എന്നതും ആയിരുന്നു അവരുടെ ചര്‍ച്ചയുടെ അവസാനം.

'മോപ്ല' യെ കുറിച്ച് മ്യൂസിയത്തില്‍ ലഭ്യമായ വിവരങ്ങള്‍ എല്ലാം ശേഖരിച്ചു അവിടെ നിന്ന് ഇറങ്ങുമ്പോള്‍ ഇത്ര ഭംഗിയുള്ള ചങ്ങായിമാരെ ഇക്കണ്ട കാടൊക്കെ നടന്നിട്ടും ഞാന്‍ കണ്ടില്ലല്ലോ എന്നൊരു ഇതുണ്ടായിരുന്നു ഉള്ളില്‍.!

തിരിച്ചു വന്ന് PhD ഗവേഷണത്തിന്റെ ഭാഗമായി പറമ്പിക്കുളത്തും ഇരവികുളത്തും കാട് കേറി നടക്കുമ്പോള്‍ ഇങ്ങനെ ചില എക്‌സ്‌ക്ലുസ്സീവ് പുല്‍ച്ചാടികള്‍ കാണേണ്ടവരുടെ ലിസ്റ്റില്‍ ഉണ്ടായിരുന്നു. അങ്ങനെ ഒരു ദിവസം പറമ്പികുളത്തു നിന്നും ഒരു ആണ്‍ 'മോപ്ല' യെ കിട്ടി. ഏകദേശം 76 വര്‍ഷങ്ങള്‍ക്ക് ശേഷം 'മോപ്ല' യുടെ മൂന്നാമത്തെ സ്‌പെസിമന്‍ , പണ്ട് ആനമല ഭാഗത്തു നിന്ന് അവര്‍ക്ക് കിട്ടിയതിനു 3 കിമീ. അപ്പുറം നമ്മുടെ പറമ്പിക്കുളം കടുവ സങ്കേതത്തില്‍ നിന്ന്. പിന്നീടുള്ള ഒരു വര്‍ഷം ഒന്ന് രണ്ടെണ്ണത്തിനെ കൂടെ കിട്ടുമോ എന്ന തിരച്ചില്‍ തുടര്‍ന്ന്, കിട്ടിയില്ല!. ആകെ ഉള്ള ഒരെണ്ണത്തിനെ വെച്ച് കീറിമുറിച്ചുള്ള പഠനങ്ങള്‍ റിസ്‌ക് ആയതു കൊണ്ട് പിന്നേയും തിരഞ്ഞു, കിട്ടിയില്ല!. അങ്ങനെ 'മോപ്ല' ഉള്‍പ്പെടുന്ന Catantopinae എന്ന Sub family യില്‍ വര്‍ക്ക് ചെയുന്ന CHF Rowell എന്ന ശാസ്ത്രജ്ഞനുമായുള്ള ചര്‍ച്ച, അദ്ദേഹത്തിന്റെ സഹായത്തോടെ ആകെയുള്ള ഒരു 'മോപ്ല' സ്‌പെസിമന്‍ കീറി മുറിച് Genetalia ഉപയോഗിച്ചുള്ള പഠനം, 2018 ല്‍ സ്വിറ്റ്‌സര്‍ലന്റിലെ ജനീവ മ്യൂസിയത്തില്‍ പോയപ്പോള്‍ അവിടെ ആല്‍പ്‌സിന്റ താഴവരയില്‍ Rowell ³sd ലാബില്‍ 10 ദിവസം.!

ഒടുവില്‍ മോപ്ലയെ കുറിച്ചുള്ള എല്ലാ സംശയങ്ങള്‍ക്കും ഉത്തരങ്ങളോടെ ഒരു ഗവേഷണ പ്രബന്ധം. പിന്നീട്, ഇപ്പോള്‍ തുടരുന്ന IUCN Grasshopper redlist assessment പഠനത്തിലും മോപ്ലയെ തിരയുന്നുണ്ട്. ഒന്ന് രണ്ട് സ്ഥലങ്ങളില്‍ നിന്നും 2021 ല്‍ കിട്ടി.

അത്രയ്ക്ക് അപൂര്‍വമായ ഒരു പുല്‍ച്ചാടി വര്‍ഗം!!.

സാധാരണ ജീവികള്‍ക് പേരിടുമ്പോള്‍ പല മാര്‍ഗരേഖകള്‍ സ്വീകരിക്കാറുണ്ട്. അവയെ കണ്ടു വരുന്ന സ്ഥലം, കണ്ടു പിടിച്ച ആളുകള്‍, അതുമല്ലെങ്കില്‍ ആ മേഖലയില്‍ തന്നെ പ്രവര്‍ത്തിക്കുന്നവരോടുള്ള ആദരസൂചകമായി അങ്ങനെ ഒക്കെ!. പക്ഷെ നമ്മുടെ നാട്ടില്‍ 1921 ന് ശേഷം വെറും 20 വര്‍ഷം ഇപ്പുറം കണ്ടുപിടിച്ച പുല്‍ച്ചാടിക്ക് ഒരു ബ്രിട്ടീഷ് ഗവേഷകന്‍ മോപ്ല എ എം എന്ന് പേര് നല്‍കിയത്, അദ്ദേഹത്തിന്റെ തന്നെ വാക്കുകളില്‍ 'Moplas, a Moslemt ribe inhabiting the Malabar region of south India' അവര്‍ ആദരിക്കപ്പെടേണ്ടവരായിരുന്നു, അല്ലെങ്കില്‍ ആണ് എന്നതിനുള്ള ഉദാഹരണമാണ്.

ശത്രുപക്ഷത്ത് നിന്നവരാല്‍ പോലും ആദരിക്കപ്പെട്ടവരാണ് അവര്‍.!