എസ്ഡിപിഐ സംസ്ഥാന, ജില്ലാ നേതാക്കള്‍ക്ക് തൃത്താല മണ്ഡലം കമ്മിറ്റി സ്വീകരണം നല്‍കി

തൃത്താല: എസ്ഡിപിഐയുടെ 2021-24 കാലയളവിലേക്ക് തിരഞ്ഞെടുക്കപ്പെട്ട സംസ്ഥാന, ജില്ലാ നേതാക്കള്‍ക്ക് തൃത്താല മണ്ഡലം കമ്മിറ്റി സ്വീകരണം നല്‍കി. പ്രസിഡന്റ് അഷറഫ് മൗലവി മൂവാറ്റുപുഴ, സംസ്ഥാന വൈസ് പ്രസിഡന്റ് തുളസീധരന്‍ പള്ളിക്കല്‍, സംസ്ഥാന സെക്രട്ടേറിയറ്റ് അംഗം എസ് പി അമീറലി, ജില്ലാ പ്രസിഡന്റ് ഷഹീര്‍ ചാലിപ്പുറം, ജില്ലാ ജനറല്‍ സെക്രട്ടറി അലവി കെ ടി, ജില്ലാ ട്രഷറര്‍ അലി കെ ടി എന്നിവര്‍ക്കാണ് സ്വീകരണം നല്‍കിയത്.

മണ്ഡലം കമ്മിറ്റി പ്രസിഡന്റ് ഇസ്മായില്‍ ഇരുമ്പകശ്ശേരി, മണ്ഡലം സെക്രട്ടറി താഹിര്‍ കൂനംമൂച്ചി ട്രഷറര്‍ അഷറഫ് എന്നിവര്‍ ചേര്‍ന്നാണ് സ്വീകരിച്ചത്. നേതാക്കളെ നൂറ് കണക്കിന് വാഹനങ്ങളുടെ അകമ്പടിയോടെ സ്വീകരണ യോഗസ്ഥലമായ ഇരുമ്പകശ്ശേരിയിലേക്ക് ആനയിച്ചുകൊണ്ടുപോവുകയായിരുന്നു.

പരിപാടിയോടനുബന്ധിച്ച് പ്രവര്‍ത്തകര്‍ സമാഹരിച്ച തുക കൊണ്ട് വാങ്ങിയ ആംബുലന്‍സ് സമാപനയോഗത്തില്‍ വച്ച് സംസ്ഥാന പ്രസിഡന്റ് അഷറഫ് മൗലവി മൂവാറ്റുപുഴ നാടിന് സമര്‍പ്പിച്ചു. ഇരുമ്പകശ്ശേരി ബ്രാഞ്ച് പ്രസിഡന്റ് നിസാര്‍ പള്ളത്തും സെക്രട്ടറി ബാസിലുമാണ് ചാവി സ്വീകരിച്ചത്.

തുളസീധരന്‍ പള്ളിക്കല്‍ ഉദ്ഘാടന പ്രഭാഷണം നടത്തി. സംസ്ഥാന സെക്രട്ടേറിയറ്റ് അംഗം എസ് പി അമീറലി, ജില്ലാ പ്രസിഡന്റ് ഷഹീര്‍ ചാലിപ്പുറം, ജില്ലാ ജനറല്‍ സെക്രട്ടറി അലവി കെ ടി, പോപുലര്‍ ഫ്രണ്ട് തൃത്താല ഡിവിഷന്‍ പ്രസിഡന്റ് ഷിഹാബ്, വിമണ്‍ ഇന്ത്യ മൂവ്‌മെന്റ് ബ്രാഞ്ച് പ്രസിഡന്റ് തെസ്ലിന ടീച്ചര്‍ എന്നിവര്‍ സംസാരിച്ചു.

ഇസ്മായില്‍ ഇറുമ്പകശ്ശേരി അധ്യക്ഷത വഹിച്ചു. താഹിര്‍ കൂനംമൂച്ചി സ്വാഗതവും തിരുമിറ്റക്കോട് പഞ്ചായത്ത് പ്രസിഡന്റ് മഷ്ഹൂദ് നന്ദിയും പറഞ്ഞു.