തിരൂരങ്ങാടിയില്‍ വന്‍ സ്പിരിറ്റ് വേട്ട; ഇരുപതിനായിരം ലിറ്ററിലധികം പിടികൂടി

തിരൂരങ്ങാടി : തിരൂരങ്ങാടിയില്‍ വന്‍ സ്പിരിറ്റ് വേട്ട. ഇരുപതിനായിരം ലിറ്ററിലധികം സ്പിരിറ്റ് പോലീസ് ഡാന്‍സാഫ് സ്‌ക്വാഡ് പിടികൂടി. പാലക്കാട് എസ്പിയുടെ ഡാന്‍സാഫ് സ്‌ക്വാഡാണ് കൊളപ്പുറം ഹൈവേയില്‍ വെച്ച് പിടികൂടിയത്.

ചരക്ക് ലോറിയിലായിരുന്നു സ്പിരിറ്റ് കടത്ത്. കര്‍ണാടകയില്‍ നിന്ന് എറണാകുളത്തേയ്ക്ക് കടത്തുകയായിരുന്ന സ്പിരിറ്റാണ് പിടികൂടിയത്.നീല കന്നാസുകളില്‍ സൂക്ഷിച്ചിരുന്ന സ്പിരിറ്റ് ടാര്‍പോളിന്‍ കൊണ്ടും, മാലിന്യം നിറച്ച ചാക്കുകളും കൊണ്ട് മറച്ച നിലയിലായിരുന്നു.

ലോറിയില്‍ ഉണ്ടായിരുന്ന ഡ്രൈവറെയും സഹായിയെയും പോലിസ് കസ്റ്റഡിയില്‍ എടുത്തു.തമിഴ്‌നാട് മീനാക്ഷിപുരം സ്വദേശി മൊയ്തീന്‍, പൊള്ളാച്ചി സ്വദേശി അന്‍പഴകന്‍ എന്നിവരെയാണ് പോലിസ് കസ്റ്റഡിയിലെടുത്തത്. മൊയ്തീന്‍ നേരത്തെയും സ്പിരിറ്റ് കേസുകളിലെ പ്രതിയാണ്. സൂത്രധാരനും ഇയാള്‍ തന്നെയാണെന്നാണ് പോലിസ് പറയുന്നത്. പരിശോധന തുടരുകയാണ് കൂടുതല്‍വിവരങ്ങള്‍ വെളിവായിട്ടില്ല.